(Video) Një i vdekur, gati 530 të lënduar në tajfunin "Champi" në Tajvan

Një person ka vdekur, ndërsa gati 530 persona janë të lënduar në tajfunin "Champi", i cili shkaktoi dëme të mëdha materiale në Tajvan, njoftuan sot shërbimet kompetente.

Një burrë vdiq të enjten në pjesën jugore të ishullit, pasi valët e tërhoqën në det.

Gjatë stuhisë ranë gati 2.200 pemë, ndërsa u dëmtuan mbi 700 objekte. Sipas raporteve mediatike, mbi 280.000 familje mbetën përkohësisht pa energji elektrike.

Tajfuni "Champi", i cili përkohësisht arriti forcën e një supertajfuni, ndërkohë është dobësuar. Shërbimi meteorologjik tajvanez regjistroi shpejtësi konstante të erës deri në 126 kilometra në orë pranë qendrës së stuhisë, me rrahje deri në 162 kilometra në orë.

Parashikohet që tajfuni të vazhdojë të lëvizë drejt veriut dhe deri të dielën të kalojë pranë provincës bregdetare kineze Zhejiang.