(Video) Shembet ndërtesa shtatëkatëshe në Stamboll: ekipet e shpëtimit kërkojnë njerëz

Sot në mëngjes, rreth orës 5:40, u shembën tre katet e para të një ndërtesë shtatëkatëshe në komunën Maltepe të Stambollit. Shërbimet përgjegjëse për ndërhyrje emergjente – duke përfshirë zjarrfikësit, policinë, ekipet e Drejtorisë për Menaxhimin e Fatkeqësive dhe Emergjencave (AFAD) dhe ekipet mjekësore – u dërguan menjëherë në vendin e ngjarjes, transmeton AP.

Shpëtimtarët fillimisht evakuuan banorët që kishin mbetur në apartamentet e kateve të sipërme, të paprekura. Në të njëjtën kohë, filloi kërkimi në rrënoja. U konstatua se punishtja e tekstilit në katin përdhes ishte bosh në momentin e shembjes.

Me ndihmën e qenve kërkues, ekipet nxorën nga rrënojat pesë persona – përfshirë dy fëmijë. Të plagosurit morën ndihmë mjekësore dhe u transportuan në spitalet afër. Gjatë operacionit, një zjarrfikës u ndje keq dhe ai gjithashtu u dërgua në spital.

Në operacion marrin pjesë një numër i madh shpëtimtarësh. Shërbimi i zjarrfikësve ka angazhuar 175 anëtarë me 56 automjete dhe qen kërkues, ndërsa AFAD në terren ka 25 anëtarë, pesë automjete dhe dy qen kërkues. Policia ka mbyllur rrugët hyrëse dhe ka siguruar zonën rreth ndërtesës për të mundësuar punën e pandërprerë të ekipeve. Për shkak të rrezikut të shembjes së mëtejshme, shpëtimtarët hyjnë në ndërtesë duke respektuar masa strikte sigurie.

Guvernatori: Asnjë nga personat e shpëtuar nuk është në gjendje kritike për jetën
Zyra e guvernatorit të Stambollit në një njoftim konfirmoi se tre katet e para të ndërtesës u shembën rreth orës 5:40 të mëngjesit dhe se të gjitha shërbimet përgjegjëse për ndërhyrje emergjente u dërguan menjëherë në vendin e ngjarjes.

Guvernatori i Stambollit, Davut Gjyl, vizitoi vendin e aksidentit së bashku me shefin e policisë së Stambollit, Selami Yildiz. Në deklaratën për mediat, Gjyl tha se ndërtesa ishte ndërtuar në vitin 1987 dhe përbëhej nga një hapësirë biznesi në katin përdhes dhe gjashtë kate banimi me gjithsej 12 apartamente.

Ai shpjegoi situatën me banorët: “Sipas regjistrimeve zyrtare, në atë adresë ishin regjistruar 33 persona. Shembja përfshiu katër apartamente të shpërndara në tre katet e para. Në ato apartamente ishin regjistruar gjithsej 14 persona. Deri tani kemi konstatuar se dy banorë mungonin, domethënë ishin në vendlindjet e tyre. Nga 12 personat e mbetur, pesë janë shpëtuar, me katër është kontaktuar, ndërsa për tre të tjerë ende po kërkohet”, deklaroi guvernatori.