(Video) Trump: Kam dy motra, njëra është e bukur, por nuk doja të isha në lidhje me të
Presidenti amerikan Donald Trump mbrëmë në një miting parazgjedhor republikan në Salina, Kansas, foli për motrat e tij, duke theksuar se nuk kishte dashur kurrë të ishte në një lidhje me to ose të martohej me to. Ai filloi të fliste për këtë ndërsa akuzonte përsëri kongresisten demokrate Ilhan Omar se ishte martuar me vëllain e saj.
„Shikoni, shumë vite më parë më pyetën: „A është e vërtetë që je në një lidhje me motrën tënde?“ Unë thashë: „Jo“. Por ajo tha diçka pak ndryshe“, filloi Trump.
„Kam dy motra të bukura. Njëra vdiq, ajo ishte një person fantastik, gjyqtare federale, gjyqtare e lartë federale. Dhe tjetra është gjithashtu e bukur, por nuk kam dashur kurrë të jem në një lidhje me të ose të martohem me të“, vazhdoi ai.
„Dhe nëse gazetarët më pyesin për këtë, nëse më pyesin ndonjëherë, do të thosha: „Jo, jo, nuk më intereson“. Aspak. Aspak, aspak. Nuk më ka shkuar kurrë në mendje“, tha Trump. Pastaj u kthye te Ilhan Omar, duke pretenduar se kur e pyetën nëse ishte martuar me vëllain e saj, ajo tha: „Sa di unë, nuk jam martuar“.
„Kjo do të thotë që është. Me fjalë të tjera, kjo do të thotë që avokati i saj i tha të mos gënjejë kur të pyesin për diçka sepse mund të përfundojë në burg“, pretendonte Trump.
Trump prej vitesh akuzon kongresisten demokrate somalo-amerikane Ilhan Omar se u martua me vëllain e saj, Ahmed Nur Said Elmi, në vitin 2009 për të kryer një mashtrim imigracioni. Omar i mohon akuzat dhe nuk ka prova që ish-bashkëshorti i saj është edhe vëllai i saj.
Presidenti amerikan ka përsëritur këto akuza disa herë në ditët e fundit, duke iu referuar motrave të tij. Në një miting në Daytona Beach, Florida, më 30 tetor, ai tha se nuk kishte propozuar kurrë martesë asnjërës prej tyre dhe se nuk ndihej i tërhequr nga ato.
Motra më e madhe e Trump, Maryanne Trump Barry, ish-gjyqtare federale, vdiq në vitin 2023 në moshën 86-vjeçare. Motra tjetër e tij është Elizabeth Trump Grau.
