Vuçiç mohon pretendimet se kishte planifikuar të qëndronte me forcë në pushtet pas humbjes në zgjedhje: Askush nga jashtë nuk më ka telefonuar

Ish-presidenti serb dhe kryetari i listës "Serbia e Bashkuar", Aleksandar Vuçiç, mohoi pretendimet e britanikut "The Times" se në natën e zgjedhjeve kishte planifikuar të qëndronte me forcë në pushtet. Ai gjithashtu mohoi se kishte hequr dorë nga plani i supozuar pas thirrjeve telefonike nga jashtë.

Vuçiç deklaroi se në natën e zgjedhjeve fillimisht po vinin rezultatet nga vendvotimet më të vogla, të cilat tregonin një avantazh të listës së tij. Megjithatë, kur pa rezultatet nga mostra përfaqësuese, kuptoi se kishin humbur qartë, veçanërisht në Beograd dhe Vojvodinë.

Sipas tij, rreth orës 21:30 vendosi të pranojë humbjen dhe t'u urojë suksese kundërshtarëve politikë, duke menduar se nuk kishte arsye për të vazhduar tensionin politik.

"Derisa atë moment askush nga jashtë nuk më ka telefonuar. Askush", deklaroi Vuçiç.

Ai përsëri akuzoi lëvizjen studentore se pas fitores në zgjedhje po ushtron, siç tha, "terror të hapur" ndaj kundërshtarëve politikë.

Britaniku "The Times" dje publikoi se Vuçiç dyshohej se ishte gati të sfidonte me forcë rezultatin e zgjedhjeve dhe të qëndronte në pushtet. Duke u thirrur në burime diplomatike dhe policore, gazeta raportoi se plani u braktis pas fitores bindëse të Listës Studentore dhe pas thirrjeve telefonike paralajmëruese nga jashtë.
Ish-komandanti i Njësisë Speciale Antiterroriste serbe, Spasoje Vuleviç, për "The Times" deklaroi se autoritetet kishin vendosur rreth 4,000 policë dhe 3,000 persona që sipas tij ishin angazhuar për të shkaktuar dhunë në Beograd.

Eurodeputeti Sandro Goci, sipas gazetës, konfirmoi se në qarqet diplomatike kishin ardhur paralajmërime për një grusht shteti të mundshëm.

Akuzat për përgatitje të qëndrimit me forcë në pushtet ende nuk janë konfirmuar në mënyrë të pavarur.