Zelenski: Nuk ka asgjë personale mes meje dhe Trumpit

Presidenti ukrainas Volodymyr Zelenski deklaroi sot se mosmarrëveshjet me presidentin amerikan Donald Trump nuk janë personale, por paralajmëroi se heqja e sanksioneve ndaj Rusisë do të forconte presidentin rus Vladimir Putin dhe do të vështirësonte arritjen e paqes në Ukrainë.

"Qëndrimi im ndaj Putinit është shumë i qartë. Mendoj se nëse heqim sanksionet, do ta bëjmë më të fortë. Kjo nuk është diçka personale mes meje dhe presidentit Trump dhe sigurisht jam kundër çdo heqjeje të sanksioneve", tha Zelenski në një intervistë për CNN në Kiev.

Ai vlerësoi se Putini nuk ka ndërmend të përfundojë luftën dhe i bëri thirrje partnerëve ndërkombëtarë që të mos lejojnë Rusinë të forcojë pozicionin e saj ushtarak dhe politik.

"Putini po luan. Ai është një lojtar. Është turp që po luan me jetët e njerëzve të tjerë dhe sigurisht nuk dëshiron të ndalojë luftën. Prandaj, ajo që duam nga partnerët tanë është që të mos i japin mundësinë të bëhet më i fortë dhe të na thyejë", tha Zelenski.

Intervista erdhi në kohën e përpjekjeve të reja diplomatike nga administrata e presidentit amerikan Donald Trump për të gjetur një zgjidhje për luftën që ka zgjatur më shumë se katër vjet e gjysmë.

Përfaqësuesi special i SHBA-së, Steve Witkoff, u takua të mërkurën në Shën Petersburg me presidentin rus Vladimir Putin, me të cilin bisedoi rreth tre orë. Witkoff u takua me Zelenskin në Oslo një ditë më parë.

Zelenski vlerësoi bisedimet në kryeqytetin norvegjez si produktive, por shprehu dyshime për gatishmërinë e presidentit rus për të përfunduar vërtet luftën.

Presidenti ukrainas theksoi se ngrirja e vijave aktuale të frontit mund të jetë pjesë e një marrëveshjeje të mundshme për armëpushim, që do të mundësonte ndalimin e luftimeve dhe fillimin e negociatave.

Sidoqoftë, ai theksoi se Ukraina nuk do të pranojë të heqë dorë nga territori që aktualisht kontrollon, as nuk do të njohë zonat e pushtuara si pjesë të Rusisë.

"Vendi ynë është shumë i rëndësishëm sepse bëhet fjalë për njerëz, jo për kilometra. Shumë kanë vdekur duke mbrojtur këtë vend, pavarësinë tonë dhe shtetin tonë", tha Zelenski.

Ai shtoi se askush nuk do të njohë territoret e pushtuara si ruse dhe shprehu keqardhje nëse disa aktorë ndërkombëtarë nuk e kuptojnë këtë qëndrim.

"Askush nuk do të njohë këto territore, të cilat janë të pushtuara përkohësisht, si territore ruse dhe mendoj se Rusia e kupton këtë. Është keq nëse dikush nuk e kupton, por kjo varet prej tyre", tha udhëheqësi ukrainas.

Zelenski deklaroi se shkëmbimi i të dhënave të inteligjencës me SHBA-në është rifilluar, por se shërbimi ushtarak i komunikimit "Starshield" i kompanisë SpaceX ende nuk është plotësisht funksional.

Ai theksoi vazhdimin e sanksioneve ndaj Rusisë dhe dorëzimin e raketave më të avancuara për mbrojtjen ajrore si nevoja kyçe të Ukrainës.

"Mos i hiqni sanksionet Putinit dhe na jepni raketa më të mira", tha presidenti ukrainas, transmeton Tanjug.

Sekretari amerikan i Shtetit, Marco Rubio, deklaroi të mërkurën se mosmarrëveshjet më të mëdha në negociata aktualisht lidhen me të ardhmen e pjesës së mbetur të Donbasit, rajoni lindor ukrainas që është kryesisht nën kontroll rus.