Dita e zgjedhjeve në Brvenicë: 16.256 qytetarë me të drejtë vote zgjedhin kryetar komune

Banorët e Komunës së Brvenicës sot votojnë në zgjedhjet lokale të parakohshme për zgjedhjen e kryetarit të komunës. Vendvotimet janë hapur nga ora 7, ndërsa votimi do të zgjasë deri në orën 19.

Në listën e zgjedhësve janë regjistruar 16.256 qytetarë me të drejtë vote nga dhjetë vendbanimet në komunë. Nga ta, 449 janë në punë të përkohshme jashtë vendit, ndërsa nëntë zgjedhës ndodhen në burg ose në paraburgim.

Pas mbylljes së vendvotimeve do të fillojë numërimi i votave, dhe rezultatet fillestare do të publikohen në përputhje me afatet e përcaktuara.

Komisjoni Shtetëror i Zgjedhjeve do të publikojë në mënyrë të njëpasnjëshme rezultatet fillestare të marra në mënyrë elektronike, ndërsa të dhënat bazuar në procesverbalet e Komisionit Komunal të Zgjedhjeve duhet të publikohen brenda 12 orëve pas përfundimit të votimit.

Komisioni Komunal i Zgjedhjeve ka afat prej shtatë orësh pas mbylljes së vendvotimeve për publikimin e rezultateve fillestare bazuar në të dhënat nga komisionet e vendvotimeve. Rezultatet do të shfaqen edhe në tabelën njoftuese në komunë dhe do të shpallen përmes mediave publike.

Sipas rregullave zgjedhore, që një kandidat të zgjidhet kryetar komune në raundin e parë, është e nevojshme të marrë shumicën e votave të zgjedhësve që kanë votuar, me kusht që në zgjedhje të ketë dalë të paktën një e treta e numrit të përgjithshëm të zgjedhësve të regjistruar.

Nëse nuk plotësohet kushti ligjor për pjesëmarrje, procedura zgjedhore përsëritet.

Rezultatet përfundimtare i përcakton dhe i publikon Komisioni Shtetëror i Zgjedhjeve në përputhje me afatet ligjore.