Qendra VERO feston traditën me manifestimin „Në shtëpi me dashuri“
Erëza dhe shija e produkteve shtëpiake, punimet tradicionale dhe vlerat që transmetohen brez pas brezi janë në fokus të manifestimit „Në shtëpi me dashuri“, i cili mbahet nga 16 deri më 18 tetor në Qendrën VERO.
Gjatë periudhës nga ora 10 deri në 16, vizitorët do të kenë mundësinë të jenë pjesë e një programi tre-ditor të dedikuar shijeve shtëpiake, produkteve tradicionale, punimeve me dorë dhe ruajtjes së trashëgimisë kulturore.
Një pjesë e veçantë e programit i kushtohet bashkëbisedimit ndërbrezash dhe transmetimit të njohurive dhe aftësive që kultivohen prej dekadash në familjet tona.
Përdoruesit e Qendrës Ditore për të moshuarit për plakje aktive pranë Kryqit të Kuq të qytetit të Shkupit do të realizojnë një punëtori kreative për prodhimin e sendeve prej balte dhe punimin me grep.
Përmes bashkëbisedimit të drejtpërdrejtë me vizitorët më të rinj të Qendrës VERO, pjesëmarrësit më të moshuar do të ndajnë aftësitë, njohuritë dhe përvojat e tyre jetësore dhe do t’u tregojnë disa nga teknikat tradicionale që për breza kanë qenë pjesë e përditshmërisë maqedonase. Në këtë mënyrë, „Në shtëpi me dashuri“ fiton edhe një dimension të veçantë social, duke krijuar një hapësirë ku brezat e ndryshëm lidhen përmes kreativitetit, traditës dhe bashkësisë.
Brenda manifestimit do të organizohet edhe një panair me punime dore dhe produkte shtëpiake, ndërsa vizitorët do të kenë mundësi të shijojnë degustime ushqimesh dhe shije të ndryshme shtëpiake. Në këtë mënyrë, ngjarja do të ofrojë një përvojë të plotë të traditës, përmes produkteve, punimeve dore, aromave dhe shijeve që na kujtojnë tryezën shtëpiake dhe zakonet familjare.
Ngjarjes do t’i bashkohen edhe disa kompani dhe marka të njohura, përfshirë Zhito Lux, Mamas, Podravka, Alkaloid, Vitalia, Montenegro dhe Buçen Kozjak, të cilat me pjesëmarrjen e tyre do ta pasurojnë ofertën dhe programin e manifestimit.
„Me „Në shtëpi me dashuri“ duam që Qendra VERO të jetë vendi ku tradita jo vetëm që mbahet mend, por edhe përjetohet dhe ndahet. Shijet shtëpiake, punimet me dorë dhe njohuritë e brezave më të moshuar janë pjesë e rëndësishme e trashëgimisë sonë. Na gëzon veçanërisht që përmes këtij eventi krijojmë hapësirë që këto vlera t’u transmetohen edhe më të rinjve“, thonë nga Qendra VERO.
Manifestimi është i hapur për të gjithë vizitorët, ndërsa Qendra VERO i fton qytetarët sot dhe nesër, më 17 dhe 18 tetor, nga ora 10 deri në 16, të shijojnë shijet shtëpiake, degustimet, kreativitetin dhe bashkëbisedimin.
(Tekst PR)
