KQZ-ja përcaktoi përmbajtjen, pamjen dhe mbrojtjen e fletës së votimit për zgjedhjet në Brvenicë

Këshilli Shtetëror i Zgjedhjeve mbajti mbledhjen e 19-të, në të cilën njëzëri përcaktoi përmbajtjen, pamjen dhe mbrojtjen e fletës së votimit për Zgjedhjet e Parakohshme për kryetar të Komunës së Brvenicës, të cilat do të mbahen më 18 tetor 2026.

Sipas nenit 33 të Rregullores dhe dispozitave përkatëse të Ligjit të Zgjedhjeve, Komisioni diskutoi këtë pikë në mbledhje të mbyllur pa praninë e publikut, me qëllim ruajtjen e konfidencialitetit të materialit zgjedhor dhe mbrojtjen e integritetit të procesit zgjedhor, përmes përcaktimit të elementeve specifike të dukshme dhe të padukshme të sigurisë në fletën e votimit.

"Gjatë përcaktimit të përmbajtjes së fletës së votimit u zbatuan plotësisht normat ligjore, sipas të cilave materiali shtypet në gjuhën maqedonase dhe alfabetin e saj cirilik, dhe në përputhje me përfaqësimin e komuniteteve në Komunën e Brvenicës, edhe në gjuhën dhe alfabetin zyrtar që përdoret nga të paktën 20% e qytetarëve në atë komunë, si dhe në gjuhën dhe alfabetin e komunitetit të cilit i përkasin kandidatët.

Radhitja e kandidatëve dhe paraqitësve të tyre është sipas listës së vetme të përcaktuar të kandidatëve, ndërsa pjesa kryesore e fletës përmban emrin e komunës, numrin e vendvotimit, emrin dhe simbolin e paraqitësit, si dhe numrin rendor, emrin dhe mbiemrin e kandidatëve. Pjesa që mbetet në bllok përmban numrin serial, komunën dhe numrin e vendvotimit. Për pjesën e mbyllur të mbledhjes do të përgatitet një procesverbal i veçantë i cili do të arkivohet në mënyrë përkatëse së bashku me regjistrimin audio dhe nuk do të publikohet në mënyrë publike. Në kuadër të rendit të miratuar të ditës, Këshilli Shtetëror i Zgjedhjeve njëzëri miratoi edhe Procesverbalin e mbledhjes së mëparshme të 18-të", njoftoi KQZ-ja.