LSDM kërkon dorëheqjen e Toshkovskit dhe ekstradimin e Mihajllovës: Të përcaktohet kush e mundësoi largimin e saj
LSDM akuzon se largimi i Iva Mihajllovës në Bullgari, pavarësisht masave gjyqësore, ishte i dakorduar paraprakisht dhe kërkon përgjegjësi politike dhe institucionale. Nga partia kërkuan dorëheqje të menjëhershme nga ministri i Punëve të Brendshme Pançe Toshkovski, si dhe nisjen e procedurës për ekstradimin e Mihajllovës.
Në konferencën e sotme për shtyp, anëtari i Bordit Ekzekutiv të LSDM-së, Andrej Zhernovski, e lidh largimin e Mihajllovës me vizitën e fundit të ministrit të Punëve të Jashtme Timço Mucunski në Sofje, duke pretenduar se pikërisht kjo ishte e dakorduar në takimin me kolegen e tij bullgare.
"Për ne, por edhe për të gjithë qytetarët, është e qartë se lirimi i Iva Mihajllovës është një punë e dakorduar, ose, për të cituar Mucunskin, se kjo është e dakorduar ‘nën radar’. Populli tani pa se çfarë në të vërtetë ka rënë dakord Mucunski në Sofje dhe për çfarë ishte takimi me kolegen e tij nga Bullgaria", deklaroi Zhernovski.
Ai kundërshtoi pohimet e mëparshme të Mucunskit se ekzekutivi nuk kishte ndërhyrë në procedurën gjyqësore dhe se sistemi shëndetësor maqedonas mund të siguronte kujdes mjekësor adekuat për Mihajllovën.
Zhernovski theksoi se Mihajllova vetë deklaroi se ka kaluar kufirin në mënyrë legale, me kartë identiteti dhe me dijeninë e zyrtarëve, megjithëse gjykata i kishte hequr pasaportën maqedonase dhe bullgare. Në të njëjtën kohë, ai iu referua informacioneve nga MPB-ja se nuk ka regjistrim të daljes nga shteti, duke vlerësuar se këto rrethana ngrejnë pyetje serioze për veprimet e institucioneve.
"Ky skandal kërkon pastrim të menjëhershëm institucional, por edhe përgjegjësi politike. Rrjeti i veprimeve dhe rrjeti i përgjegjësisë duhet të dalin në dritë. Pançe Toshkovski duhet të japë dorëheqje menjëherë, sepse e gjithë kufiri i shtetit tonë është nën kompetencën e tij", tha Zhernovski.
LSDM konsideron se bisedat diplomatike dhe paralajmërimet për urdhërarrestime nuk janë të mjaftueshme dhe kërkon që institucionet kompetente menjëherë të ndërmarrin hapat ligjorë të nevojshëm për ekstradimin e Mihajllovës, e cila dyshohet në një rast aksidenti rrugor me pasoja vdekjeprurëse.
Zhernovski kërkoi të përcaktohet nëse dikush nga kompetentët ka dhënë urdhëra ose udhëzime të paligjshme dhe nëse është mundësuar largimi i saj në kundërshtim me masat gjyqësore.
"Mihajllova duhet të jetë e disponueshme për procedurën gjyqësore, dhe institucionet duhet të veprojnë dhe ta sigurojnë këtë", theksoi Zhernovski, duke shtuar se partia do të insistojë për përgjegjësi për çdo person që do të konstatohet se ka marrë pjesë në veprime të mundshme të paligjshme.
