Komuna Qendër me një sërë aktivitetesh për parandalimin e bullizmit, dhuna ndërmjet bashkëmoshatarëve duhet të njihet dhe parandalohet në kohë

Komuna Qendër me një sërë aktivitetesh edukative shënoi Ditën Ndërkombëtare kundër dhunës dhe bullizmit në shkolla, me qëllim ngritjen e vetëdijes, njohjen e hershme dhe parandalimin e dhunës ndërmjet bashkëmoshatarëve.

Gjatë javës, në ambientet e Qendrës Rinore "Matinço" u mbajtën punëtori të dedikuara për prindërit, mësuesit dhe bashkëpunëtorët profesionalë, me theks të veçantë në rolin e familjes dhe shkollës në parandalimin e këtij fenomeni.

Punëtoritë u drejtuan nga prof. dr. Tatjana Stojanoska Ivanova, e cila me të pranishmit diskutoi për njohjen e hershme, reagimin e duhur dhe parandalimin e dhunës ndërmjet bashkëmoshatarëve, duke ndarë këshilla profesionale dhe udhëzime praktike.

"Dhuna ndërmjet bashkëmoshatarëve është një problem që nuk duhet të injorohet dhe për parandalimin e të cilit të gjithë kemi përgjegjësi. Është e rëndësishme që prindërit, mësuesit dhe shërbimet profesionale të njohin në kohë kur fëmija përballet me dhunë dhe të reagojnë në mënyrë të përshtatshme. Heshtja dhe injorimi mund të lënë pasoja serioze dhe afatgjata mbi fëmijën dhe gjithë familjen", theksoi kryetari i komunës Goran Gerasimovski.

Paralelisht, edhe në shkollat fillore qendrore u realizuan aktivitete të ndryshme të dedikuara shëndetit mendor dhe parandalimit të dhunës ndërmjet bashkëmoshatarëve. Nxënësit ndoqën ligjërata edukative mbi temën "Dhuna ndërmjet bashkëmoshatarëve" në bashkëpunim me SPB Shkup, u organizuan punëtori me moton "NDAL bullizmit", ndërsa disa nga nxënësit vizituan edhe shfaqje teatrale përmes të cilave, në mënyrë interesante dhe të qasshme, u përcollën mesazhe për miqësinë, pranimin dhe ndërtimin e marrëdhënieve të shëndetshme ndërmjet bashkëmoshatarëve.