LDP: Me politika të tilla nesër nuk do të ketë kush të drejtojë institucionet, kartat partiake nuk mund të zëvendësojnë njohuritë
Me politika të tilla nesër nuk do të ketë kush të drejtojë institucionet, kartat partiake nuk mund të zëvendësojnë njohuritë, thonë nga LDP.
„Kush do t'i shërojë qytetarët nesër? Kush do të projektojë ura, do të zhvillojë teknologji të reja, do të drejtojë institucionet shkencore dhe do të lëvizë ekonominë? Drejtorët partiakë? Kartat partiake? Apo presim të importojmë njohuri përgjithmonë ndërsa eksportojmë falas ato tona? Me këtë ritëm, së shpejti nuk do të jetë pyetja se cila parti do të drejtojë institucionet, por nëse do të mbeten mjaftueshëm njerëz të kualifikuar që mund t'i drejtojnë. Qeveria njofton se buxheti për shkencën është rritur nga 380 milionë denarë në vitin 2024, në 680 milionë në vitin 2025 dhe 773 milionë denarë në vitin 2026. Por, një rritje nga një bazë e ulët nuk është e njëjta gjë me arritjen e standardeve evropiane! Komisioni Evropian në raportin për vitin 2025 paralajmëron se investimet në kërkim dhe inovacion mbeten shumë të ulëta, ndërsa pjesëmarrja e sektorit privat është minimale“, thuhet në njoftim.
Dhe ndërsa Qeveria numëron milionat, thonë nga LDP, rezultatet e testimit PISA tregojnë gjendjen shqetësuese në arsim.
„Vetëm rreth 35% e nxënësve tanë 15-vjeçarë arrijnë nivelin bazë të njohurive në shkencat natyrore, krahasuar me 76% në vendet e OECD-së. Këto nuk janë vetëm përqindje. Kjo është një paralajmërim për të ardhmen e tërë shtetit. Sipas të dhënave ndërkombëtare, Maqedonia në vitin 2021 investonte vetëm 0.38% të PBB-së në kërkim dhe zhvillim, ndërsa Sllovenia në vitin 2023 shpenzonte 2.13%. Edhe pse bëhet fjalë për vite të ndryshme, diferenca tregon qartë sa i madh është hendeku zhvillimor që duhet të kapërcejmë“, thonë nga partia.
LDP akuzon se për dekada politika krijon hapësirë për punësime partiake, ndërsa të rinjtë e talentuar kërkojnë mundësi jashtë Maqedonisë. Ata thonë se nuk mund të ndërtojmë një shtet evropian me partizim, shkencëtarë të nënvlerësuar, investime të pamjaftueshme dhe breza për të cilët perspektiva e vetme është një biletë në një drejtim.
„LDP kërkon nga Qeveria të ndalojë prezantimin e rritjeve buxhetore si sukses përfundimtar dhe të ofrojë një plan konkret për arritjen e standardeve evropiane në shkencë dhe arsim. Kërkojmë investime më të mëdha dhe të parashikueshme, laboratorë modernë, mbështetje për kërkuesit e rinj, lidhje të universiteteve me biznesin dhe departizim të institucioneve. Kërkojmë gjithashtu një llogari publike se sa nga fondet e paralajmëruara janë investuar realisht në projekte shkencore dhe çfarë rezultate janë arritur. Qeveria duhet të përgjigjet: Çfarë Maqedonie planifikon të lërë pas vetes – një shtet njohurie, inovacioni dhe njerëzish të aftë apo një shtet me drejtorë partiakë, institucione bosh dhe të rinj që largohen? Pa shkencë nuk ka zhvillim. Pa njerëz të kualifikuar nuk ka institucione funksionale. Dhe pa të rinjtë nuk ka të ardhme për Maqedoninë“, thonë nga LDP.
