Levica: Për interesat e kujt po gërmohet Parku i Frankofonisë dhe pse Komuna Qendër hesht?

Në Parkun e Frankofonisë, një nga pak sipërfaqet e gjelbra të mbetura në zonën qendrore të qytetit, po kryhen gërmime me makineri të rënda, thonë nga Levica.

Sipas informacioneve që kanë marrë nga terreni, bëhet fjalë për një ndërhyrje lidhur me realizimin e një lidhjeje private të ujësjellësit për një objekt gastronomik të lidhur me "Raguzën", ku planifikohet një trase rreth 200 metra në hapësirën publike.

"Grupi ynë i këshilltarëve menjëherë pas marrjes së informacionit ka alarmuar me telefon inspektorët kompetentë në Komunën Qendër dhe ka kërkuar veprim të menjëhershëm dhe verifikim të gjendjes në terren.
Ndërsa qytetarët e Qendrës dëshmojnë prej vitesh për zvogëlimin e sipërfaqeve të gjelbra, uzurpimin e hapësirës publike dhe nënshtrimin e saj ndaj interesave të individëve, tani lind një pyetje kyçe: si është e mundur që një park publik të gërmohet për nevojat e një subjekti privat biznesi? Kush e ka lejuar këtë ndërhyrje? Bazuar në cilën dokumentacion? A ekziston ndonjë leje e dhënë për gërmimin e hapësirës së gjelbër publike dhe a është vlerësuar më parë dëmi ndaj gjelbërimit?", pyesin nga partia.

Veçanërisht skandaloze është, shtojnë nga Levica, që Komuna Qendër dhe kryetari Goran Gerasimovski deri tani nuk kanë dhënë asnjë shpjegim publik për aktivitetet në Parkun e Frankofonisë.

"Prandaj, në mënyrë publike i bëjmë thirrje kryetarit Gerasimovski të përgjigjet: A është informuar Komuna Qendër për gërmimet? A ka dhënë ndonjë leje apo miratim? Pas alarmimit telefonik nga grupi i këshilltarëve, a kanë dalë inspektorët komunalë në terren? Kush e ka porositur dhe financuar këtë ndërhyrje dhe a janë në rrezik pemët dhe gjelbërimi dhe kush do të paguajë për sanimin e parkut? Nëse kompetenca për këtë ndërhyrje i takon Qytetit të Shkupit, kjo nuk e lirë Komunën Qendër nga detyrimi për të mbrojtur hapësirën publike në territorin e saj, as nga detyrimi për të kërkuar veprim të menjëhershëm nga të gjitha institucionet kompetente", thonë nga Levica.

Partia kërkon inspektim të menjëhershëm, publikim të plotë të dokumentacionit lidhur me ndërhyrjen dhe përcaktim të përgjegjësisë eventuale për dëmtimin e hapësirës publike dhe sanimin e saj në kohën më të shkurtër të mundshme.

"Derisa të përcaktohet ligjshmëria dhe kushtet nën të cilat po kryhen këto punime, kërkojmë ndalimin e menjëhershëm të të gjitha aktiviteteve që mund të dëmtojnë më tej gjelbërimin dhe parkun. Parku i Frankofonisë është hapësirë publike që i përket qytetarëve dhe jo një korridor infrastrukturor privat që gërmohet kur dhe si i përshtatet interesave të bizneseve private", thonë nga Levica.