Limani: Komuna e Gostivarit do të ndajë 100 kupona për mamografi falas në kuadër të „Tetor Rozë“

Komuna e Gostivarit do të ndajë 100 kupona për mamografi falas për gratë dhe vajzat, në kuadër të aktiviteteve për shënimin e Muajit të Ndërgjegjësimit për kancerin e gjirit, i njohur si „Tetor Rozë“.

Këtë e njoftoi kryetari i Komunës së Gostivarit, Valbon Limani, duke theksuar rëndësinë e kontrolleve të rregullta dhe zbulimit të hershëm në luftën kundër kësaj sëmundjeje.

„Ndërgjegjësimi dhe zbulimi i hershëm janë thelbësore për mbrojtjen e shëndetit të grave. Edhe këtë vit, Komuna e Gostivarit do të ndajë 100 kupona për mamografi falas, me qëllim që t’u japim mbështetje grave dhe vajzave dhe t’i inkurajojmë për kontrolle parandaluese të rregullta“, theksoi Limani.

Në kuadër të „Tetor Rozë“, Komuna e Gostivarit, në bashkëpunim me Shoqatën „Ezra“, organizoi edhe një punëtori informative me të njëjtin titull, ku gratë dhe vajzat e pranishme patën mundësinë të informohen dhe të bisedojnë me profesionistë shëndetësorë për kancerin e gjirit, rëndësinë e kontrolleve të rregullta dhe mundësitë për zbulim të hershëm.

Në punëtori morën pjesë Miranda Iziri, specialiste e radiologjisë, dhe Ilir Ismaili, onkolog, të cilët ndanë informacione dhe këshilla për rëndësinë e kujdesit të vazhdueshëm për shëndetin.

Përmes këtyre aktiviteteve, Komuna e Gostivarit synon të rrisë ndërgjegjësimin për kancerin e gjirit dhe të inkurajojë gratë që t’i kushtojnë më shumë vëmendje kontrolleve parandaluese, njoftojnë nga komuna.