MPJ: Deklaratat e Demerdzhievit dhe Radukovit për Iva Mihajllovën janë fyerje dhe provokim
Sot, në Ministrinë e Punëve të Jashtme dhe Tregtisë së Jashtme, u thirr një përfaqësues i Ambasadës së Republikës së Bullgarisë, i cili në mungesë të ambasadorit ushtron funksionin e përfaqësuesit të përkohshëm.
"Në takimin u shpreh pakënaqësi për deklaratën e fundit të ministrit të Punëve të Brendshme të Republikës së Bullgarisë, Ivan Demerdzhiev, lidhur me rastin e Iva Mihajllovës, e cila u vlerësua si fyerëse dhe provokuese. Gjithashtu, u shpreh pakënaqësi edhe për deklaratën e ambasadorit Zheljazko Radukov për televizionin bullgar BTV, të cilën e vlerësojmë si ndërhyrje të drejtpërdrejtë në punët e brendshme të shtetit tonë, duke pasur parasysh kualifikimet e shprehura në lidhje me punën e institucioneve kompetente", thanë nga Ministria.
Atje thanë se nga ana maqedonase u theksua veçanërisht se këto provokime largojnë dialogun bilateral nga kuadri në të cilin duhet të zhvillohen marrëdhëniet e fqinjësisë së mirë – bazuar në respekt të ndërsjellë, përmbajtje dhe komunikim konstruktiv.
"Në këtë kontekst, u theksua se kjo sjellje mund të imponojë nevojën për një reagim institucional të përshtatshëm në përputhje me dispozitat e Konventës së Vjenës për marrëdhëniet diplomatike, e cila përcakton qartë kuadrin e veprimit diplomatik dhe parimin e mosndërhyrjes në punët e brendshme të shtetit pritës. Në fund të takimit u theksua edhe një herë përkushtimi ynë për zhvillimin e marrëdhënieve të fqinjësisë së mirë, të bazuara në respekt të ndërsjellë, besim dhe parime evropiane, ku të njëjtin përkushtim dhe përgjegjësi e presim edhe nga ana bullgare", njoftuan nga Ministria.
Radukov, në një intervistë për televizionin bullgar BTV, deklaroi se do të ishte jashtëzakonisht i befasuar nëse autoritetet maqedonase nuk do të dinin për largimin e saj, por theksoi se nuk ka informacione që kjo të ketë qenë e rënë dakord paraprakisht.
