Në Maqedoni për herë të parë është kryer transplantim i veshkës nga nëna te fëmija me sindromën Alport
Në Maqedoni për herë të parë është kryer transplantim i veshkës nga nëna te fëmija me sindromën Alport, një sëmundje e rrallë gjenetike trashëguese që dëmton indin e veshkës dhe mund të çojë në dobësi të veshkave, njoftoi Ministria e Shëndetësisë.
Pas kryerjes së nevojshme të ekzaminimeve mjekësore, u konstatua përputhshmëria midis dhuruesit dhe marrësit, ndërsa nëna u vlerësua si dhurues i gjallë i përshtatshëm. Vendimi i saj i jep fëmijës një shans të ri për jetë dhe përfaqëson një sukses të rëndësishëm mjekësor në trajtimin e pacientëve me sëmundje të rralla.
"Ky është shembulli më i mirë në shëndetësinë tonë – profesionalizmi, puna në ekip dhe humanizmi. Çdo veshkë e transplantuar do të thotë një shans i ri për jetë", tha ministri i Shëndetësisë, Sašo Klekovski.
Para disa ditësh, ministri Klekovski vizitoi pacientët të cilëve u ishte kryer transplantim i veshkës në Klinikën Universitare të Urologjisë. Tek dy pacientë u transplantua veshka nga një dhurues i ndjerë, ndërsa tek i treti u krye transplantim nga një dhurues i gjallë.
Me këto tre transplantime, numri total i transplantimeve të veshkës në Klinikën Universitare të Urologjisë këtë vit arriti në 15, krahasuar me 11 transplantime gjatë gjithë vitit 2025.
Sindroma Alport është një sëmundje e rrallë trashëguese që prek indin e veshkës, dhe në rastet më të rënda mund të çojë në dobësi të veshkave dhe nevojë për dializë. Ky rast tregon se me diagnostikim të duhur, vlerësim të thelluar mjekësor dhe përgatitje të kujdesshme, transplantimi mund të jetë një mundësi edhe për pacientët me sëmundje të rralla gjenetike.
"I shprehim falënderimet familjes për besimin dhe për miratimin që rasti të ndahet publikisht, si dhe të gjithë ekipit mjekësor që punon pa ndërprerje në këtë procedurë komplekse mjekësore", deklaroi prof. dr. Biljana Kuzmanovska, koordinatore kombëtare për transplantim.
