Prezantim më efektiv i provave dhe transparencë e rritur – OSBE vlerëson pozitivisht Prokurorinë në procedurat për krim të organizuar dhe korrupsion
Prokuroria Publike po përmirëson më tej praktikat e mira për komunikim të rregullt me publikun, duke publikuar njoftime, përmbledhje dhe duke organizuar konferenca për rastet të mbuluara nga Projekti Rajonal për Vëzhgimin e Procesit Gjyqësor në Ballkanin Perëndimor, i cili zbatohet nga OSBE me mbështetje financiare nga Bashkimi Evropian, njoftoi prokuroria.
Prokurori publik Elvin Veli nga Prokuroria Publike e Republikës së Maqedonisë së Veriut, kryetari i Këshillit të Prokurorëve Publikë Bashkim Besimi dhe prokurorja publike nga OJOGOKK Natasha Pop Trajkova, në ftesë të Organizatës për Siguri dhe Bashkëpunim në Evropë (OSBE), marrin pjesë në Konferencën Rajonale "Nga letra në praktikë: Si reformat në drejtësi të sjellin rezultate në rastet e krimit të organizuar dhe korrupsionit", e cila mbahet në Budva, Mali i Zi dhe ku u prezantua raporti i vëzhgimit të proceseve gjyqësore në Ballkanin Perëndimor.
Në raport, përveç transparencës lidhur me rastet me interes të lartë publik për të cilat Prokuroria Publike merr vlerësime të larta krahasuar edhe me vendet e tjera në rajon, theksohet edhe përkushtimi i dukshëm për krijimin e kuadrove strategjike të orientuara drejt më shumë hapjeje dhe llogaridhënie. Këtu theksohet miratimi i strategjisë së komunikimit, si një hap i rëndësishëm për forcimin e besimit të publikut dhe përmirësimin e komunikimit më proaktiv dhe më profesional.
"Nga aspekti i prokurorisë, u shfaqën disa praktika pozitive në lidhje me prezantimin efektiv të provave dhe veprimet para gjykatës. Në disa raste, prokurorët publikë morën pjesë aktive në planifikimin e gjykimeve, propozuan orare reale për prezantimin e provave dhe morën përgjegjësi për thirrjen e dëshmitarëve të tyre", vë në dukje raporti, duke rekomanduar që këto hapa pozitive të vazhdojnë të zbatohen në mënyrë të qëndrueshme.
Si një segment tjetër i rëndësishëm që lidhet me punën e Prokurorisë Publike, OSBE thekson edhe aktivitetet që bëhen përmes Shoqatës së Prokurorëve Publikë, në bashkëpunim me Ambasadën e SHBA-së në Shkup, me qëllim përmirësimin e cilësisë së aktakuzave.
"Prokuroria Publike e Shtetit gjithashtu mbështeti këto iniciativa, me vëmendje të veçantë në përmirësimin e prezantimit të provave para gjykatës dhe forcimin e efektivitetit të prokurorëve publikë gjatë gjykimeve", thuhet në raport.
Si një përparim pozitiv u shënuan edhe aktivitetet për hartimin e rregulloreve të reja për mbikëqyrjen e punës së prokurorive publike dhe për vlerësimin e punës së prokurorëve publikë, një iniciativë e mbështetur përmes Projektit për Sundimin e Ligjit të financuar nga BE-ja dhe që ka për qëllim të harmonizojë rregulloret ekzistuese të brendshme dhe të krijojë mekanizma më të qartë për mbikëqyrje dhe vlerësim profesional.
Vetë raporti në disa pjesë kyçe evidenton burimet e pamjaftueshme njerëzore dhe financiare me të cilat disponon prokuroria, si një kusht i rëndësishëm për rritjen e mëtejshme të efikasitetit.
"Duket se kjo është një nga çështjet më kritike që kërkon një qasje të dyfishtë: përpjekje të vazhdueshme nga ana e prokurorisë për përmirësimin e efikasitetit, në kombinim me mbështetje institucionale të përshtatshme dhe sigurimin e burimeve. Zgjidhja e të dy aspekteve është e nevojshme për të thyer rrethin ku pritet përmirësim i efikasitetit para se të sigurohen burime shtesë, ndërsa prokurorët publikë konsiderojnë se burimet shtesë janë të nevojshme për arritjen e efikasitetit më të madh", thuhet në raportin e OSBE-së.
Brenda këtij projekti, në vend u vëzhguan numri më i madh i rasteve krahasuar me vendet e tjera në rajon, përkatësisht 16 raste për vepra penale të krimit të organizuar dhe 56 raste në fushën e korrupsionit.
Rastet u përzgjodhën sipas rëndësisë së veprës penale, statusit të të akuzuarve dhe shkallës së interesit publik, ku prioritet u jepet rasteve në të cilat siguria juridike, kredibiliteti institucional dhe besimi i publikut janë me rëndësi më të madhe. Në këtë mënyrë vëmendja drejtohet drejt procedurave ku kapacitetet institucionale, drejtësia, efikasiteti dhe besimi i publikut janë vënë në provën më të madhe.
Në të gjitha rastet, Projekti interpreton efikasitetin e drejtësisë bazuar në tre aspekte të ndërlidhura: kapacitetet, në kuptimin e cilësisë, qëndrueshmërisë dhe kushteve për mbështetje të praktikës profesionale dhe institucionale; drejtësinë, e shqyrtuar përmes garancive për gjykim të drejtë, barazisë para ligjit dhe vendimeve gjyqësore të arsyetuara; dhe efikasitetin, kuptuar si menaxhimi i kompleksitetit, kohës dhe burimeve pa cenuar drejtësinë ose cilësinë.
