Vlen: 335 mijë euro për hallet e Grubit, ndërsa mbi 350 mijë shqiptarë e braktisën vendin

„Hallet e Artan Grubit janë pasaporta. Për të janë ofruar mbi 335 mijë euro garanci, vetëm që të jetë i lirë dhe të mund të vazhdojë jetën e tij. Sot shohim njerëz nga kampi i Grubit që ofrojnë pasuri si garanci. Por, pyetja mbetet: Për kë është ajo pasuri dhe si është fituar? Edhe fëmijët dhe të rriturit e dinë sa vite pune dhe sakrificë duhen për të ndërtuar një shtëpi. Ndërsa për problemin e Grubit, qindra mijëra euro menjëherë vihen në tavolinë“, thonë nga Vlen.

„Por, pyetja kryesore është tjetër: Pse kur problemi ishte qytetari, nuk kishte as para, as zgjidhje, as përgjegjësi?

Gjatë viteve të sundimit të DUI-së, mbi 350 mijë shqiptarë u larguan në emigracion. Pas këtij numri nuk fshihen vetëm shifra, por familje të ndara, shtëpi të zbrazura, prindër që mbetën të presin dhe një brez i tërë i të rinjve që u detyruan të kërkojnë të ardhmen e tyre larg vendlindjes.

Ndërsa shqiptarët largoheshin për të siguruar ekzistencë dhe jetë më të mirë, funksionarët e DUI-së ndërtonin pasuri, dhe sot aktivistët e tyre dalin për të mbrojtur „shpëtimtarin e Mijalkovit“, njeriun nga lista e zezë amerikane dhe njeriun që mbolli bixhozin në çdo vendbanim shqiptar.

Kjo është diferenca mes problemeve të qytetarëve dhe problemeve të DUI-së. DUI-ja kishte pushtetin, por shqiptarëve u la emigracioni.

Sot, me VLEN-in, punohet që të rinjtë të mos e shohin largimin si opsion të vetëm dhe ata që janë larguar të kenë arsye të kthehen në vendin e tyre“, thuhet në njoftimin e Vlen.