Vlen: Gjashtë policë janë pezulluar, askush nuk mund të shpëtojë nga përgjegjësia!

„Gjashtë policë janë pezulluar pas dhunës brutale ndaj dy të rinjve nga Saraji. Institucionet reaguan në kohë rekord dhe kundër tyre janë nisur procedura disiplinore. Rasti nuk mbeti pa përgjigje. MPB-ja e përfundoi pjesën e saj të punës, ndërsa procedurën e mëtejshme e udhëheq Prokuroria“, tha Astrit Iseni nga Vlen.

„Nuk ka vend për dhunë policore në shtetin tonë. Uniforma shërben për të mbrojtur qytetarin, jo për ta rrahur atë. Asnjë dyshim nuk justifikon dhunën ndaj qytetarit.

Por sapo u shfaqën incizimet, opozita shqiptare u përpoq dhunën ndaj dy të rinjve ta kthejë në një llogari politike. Filluan akuzat, propaganda dhe përpjekjet për t’i dhënë rastit një ngjyrë etnike.

Pezullimi i gjashtë policëve është dëshmi se sistemi funksionon. Kjo është fitore e integritetit mbi manipulimet. Fitore e arsyes së shëndoshë mbi përpjekjet për ndezje të tensioneve ndër-etnike.

Dhe tani, pasi DUI kërkoi edhe dorëheqjen time, kam disa fjalë për t’ju thënë. Juve, që gjuha juaj është gjithmonë gati për shpifje dhe propagandë.

Njëzet vjet ishit në pushtet. Gjatë sundimit tuaj ndodhën ngjarje të tmerrshme, shumë prej tyre të lidhura me veprimet e policisë dhe institucioneve të drejtësisë. Ngjarje që shqiptarët nuk i harrojnë.

Nuk harrohet „Sopoti“, ku i lanë njerëzit të vdisnin në burgje.

Nuk harrohet djegia e dyqaneve shqiptare, ndërsa ju vazhdonit të qëndronit si dekor në pushtet.

Nuk harrohet „Monstrumi“, as fyerjet ndaj shqiptarëve me fjalën „indianë“.

Nuk harrohet vdekja e Redzhail Qerimit në burg.

Nuk harrohet vrasja e Harun Aliut.

Nuk harrohet as vrasja e Džemail Redžepit.

Për të gjitha këto raste, dhe për shumë të tjera, çfarë bëtë JU? Asgjë. Heshtët!

Sado që përpiqeni t’i fshini këto ngjarje nga kujtesa kolektive e shqiptarëve, nuk do të mundeni.

Nuk do të mundeni, sepse shqiptarët ju mbajnë mend mirë. Ju jeni parti me shumë mëkate,….. nga fillimi deri në fund.

Me largimin e DUI-së në opozitë përfundoi koha e rasteve të montuara, vrasjeve, vjedhjeve dhe skenarëve për llogari politike. Përfundoi edhe koha kur dikush mendonte se mund të bënte çfarë të donte pa u përgjigjur.

Ajo kohë nuk do të kthehet. Kurrë. Kurrë më!“, deklaroi Astrit Iseni nga Vlen.