Dhuna policore duhet të hetohet deri në fund, VLEN nuk duhet të heshtë, thonë nga Aleanca për Shqiptarët

Nga Aleanca për Shqiptarët kërkojnë, siç theksojnë në një njoftim, zbardhje të menjëhershme dhe të plotë të rastit në të cilin dy të rinj, në moshë 21 dhe 23 vjeç, pretendojnë se janë maltretuar fizikisht nga pjesëtarë të policisë dhe se automjeti i tyre është dëmtuar.

Fakti që vetë Ministria e Punëve të Brendshme ka nisur një kontroll të brendshëm, sipas kësaj partie, tregon se pretendimet janë serioze dhe kërkojnë një hetim të shpejtë dhe transparent, pa asnjë përpjekje për të relativizuar rastin.

„Policia duhet të jetë garanci për sigurinë e çdo qytetari, jo burim frike. Çdo tejkalim i kompetencave, përdorim i paarsyeshëm i forcës ose maltretim duhet të marrë përgjigje institucionale dhe ligjore të përshtatshme.

Në këtë situatë, heshtja e VLEN dhe e zv.ministrit të Punëve të Brendshme Astrit Iseni është e papranueshme. Kur je pjesë e drejtimit të MPB-së, përgjegjësia nuk mbaron me deklarata politike. Duhet veprim, transparencë dhe përgjegjësi“.

Aleanca për Shqiptarët kërkon, shtojnë ata, që hetimi të përfundojë pa vonesë, rezultatet të publikohen hapur dhe, nëse vërtetohet keqpërdorimi i detyrës zyrtare ose dhuna ndaj të rinjve, përgjegjësit të sanksionohen pa përjashtim.

„Askush me uniformë nuk mund të jetë mbi ligjin dhe askush në pushtet nuk mund të fshihet pas heshtjes“.