Aleanca për Shqiptarët: Ne nuk jemi mysafirë në këtë shtet dhe nuk do të pranojmë të jemi pengje të llogarive politike të askujt!
„Ne, shqiptarët, gjithmonë kemi respektuar dhe mbështetur identitetin, gjuhën dhe dinjitetin e bashkëqytetarëve tanë maqedonas, edhe kur ky respekt nuk ka qenë i ndërsjellë. Asnjëherë nuk kemi vënë në dyshim identitetin e tyre, ndërsa ne vetë vazhdojmë të jemi të përcaktuar në Kushtetutë me formulimin poshtërues prej 20 përqindësh“, thonë nga Aleanca për Shqiptarët.
„Shqiptarët përbëjnë pothuajse një të tretën e popullsisë. Ne nuk jemi mysafirë në këtë shtet dhe nuk do të pranojmë të jemi pengje të llogarive politike të askujt!
Marrëveshja është marrëveshje! Detyrimet nga viti 2022 duhet të përmbushen, pavarësisht nëse i pëlqen Mickoskit apo jo. Frika nga kushte hipotetike nga ana e Bullgarisë nuk mund të shërbejë si justifikim për bllokimin e së ardhmes evropiane.
Mickoski ishte në një pozicion më të favorshëm në vitin 2024 sesa është sot, në vitin 2026. Nëse vazhdon kështu, në vitin 2028 me shumë gjasa do të jetë në një pozicion edhe më të dobët. Koha tregon se sa më shumë të shtyhet procesi, aq më shtrenjtë e paguajnë të gjithë qytetarët, pavarësisht përkatësisë etnike.
Të rinjtë po largohen, familjet po emigrojnë, ndërsa politika vazhdon të fitojë kohë. Gruevski na humbi një dekadë. Shqiptarët nuk do të presin një dekadë tjetër për Mickoskin!
Ju jeni Qeveri, keni mandat dhe përgjegjësi. Gëlltisni këtë kafshatë, miratoni ndryshimet kushtetuese dhe hapni rrugën evropiane! Nëse nesër shfaqen pengesa të reja, përballuni me to atëherë. Ne kemi treguar durim, mirëkuptim dhe mbështetje. Por durimi nuk është i pafund.
Në rrugën evropiane nuk jeni vetëm. Por mos na detyroni ne, shqiptarët, t’ju lëmë vetëm në bllokadën tuaj politike. Kjo nuk do të ishte rrugë e mirë për askënd.
Aleanca për Shqiptarët nuk do të mbështesë politika që sakrifikojnë të ardhmen e qytetarëve për interesa partiake. Mjaft me justifikime! Është koha për vendime SOT, jo në vitin 2028!“, thuhet në njoftimin e Aleancës për Shqiptarët.
