"Qeveria e Mickoskit pranon dështim fiskal – gaboi në parashikime, shkurton investimet dhe e ngarkon shtetin me borxhe", thonë nga Levica

"Qeveria për herë të dytë këtë vit rishikon Buxhetin, duke ulur të ardhurat dhe shpenzimet për rreth 5.3 miliardë denarë, ose mbi 86 milionë euro. Edhe pse të ardhurat e ulura nga TVSH-ja dhe akcizat për karburantet përmenden si arsye kryesore, realizimi i dobët i disa pozicioneve buxhetore tregon për një problem më të gjerë me planifikimin dhe zbatimin e financave publike. Ndryshimi i përsëritur i parashikimeve është tregues për planifikim joreal dhe mungesë të politikës fiskale të parashikueshme", thonë nga partia Levica.

"Goditja më e madhe i bie investimeve kapitale, të cilat ulen për mbi 94 milionë euro. Me realizim prej vetëm 54% deri më 8 nëntor, Qeveria në vend që të përshpejtojë projektet dhe të eliminojë arsyet e realizimit të dobët, përsëri i ul qëllimet e veta. Investimet e shtyra nënkuptojnë zhvillim të shtyrë, kërkesë më të ulët për kompanitë vendore dhe mundësi të humbura për krijimin e vlerës ekonomike.

Njëkohësisht, deficiti buxhetor arrin në 4.1% të PBB-së, ose 46.3 miliardë denarë, ndërsa parashikimi për rritjen ekonomike u ul nga 3.8% në 3.5%. Ulja e të ardhurave dhe shpenzimeve buxhetore nuk zgjidh problemin fiskal: shteti vazhdon të shpenzojë më shumë sesa mbledh, dhe diferenca mbulohet përmes huamarrjes.

Rishikimi i vazhdueshëm i Buxhetit nuk është menaxhim i përgjegjshëm i financave publike, por pranim i dështimit për të realizuar qëllimet fillimisht të planifikuara. Pasojat i paguajnë qytetarët përmes projekteve infrastrukturore të shtyra dhe mundësive të humbura për përmirësimin e shërbimeve publike. Paratë publike duhet të shndërrohen në standard më të mirë jetese, produktivitet dhe zhvillim, e jo në parashikime të parealizuara që Qeveria i ul më tej për të fshehur diferencën midis planifikuarës dhe arriturës", njoftoi partia Levica.