VMRO-DPMNE kërkon kontroll për objektin e Musliu në Vllaj: Nga vijnë paratë për ndërtimin?

VMRO-DPMNE i ka bërë thirrje ish-presidentit Stevo Pendarovski dhe ish-bashkëpunëtorit të tij të afërt Erold Musliu të japin përgjigje për ndërtimin e një objekti në lagjen Vllaj të Shkupit. Nga partia kërkojnë të hetohet prejardhja e mjeteve për investimin, gjendja pasurore dhe të ardhurat e deklaruara të Musliut, si dhe ekzistenca eventuale e konfliktit të interesave.

Në njoftim bëhet thirrje Prokurorisë Publike dhe Komisionit Shtetëror për Parandalimin e Korrupsionit që të kontrollojnë dokumentacionin, financimin dhe ligjshmërinë e investimit.

"Rasti me ndërtimin e objektit në Vllaj për të cilin Pendarovski pranoi se është i bashkëpunëtorit të tij të afërt Erold Musliu meriton përgjigje konkrete.

Stevo Pendarovski duhet të shpjegojë publikisht se çfarë di saktësisht për këtë objekt, cila është lidhja e tij me Musliun dhe pse ky rast ngre dyshime për një konflikt të mundshëm interesi.

Pyetja është nga vijnë mjetet për një investim të tillë?

A përputhet gjendja pasurore dhe të ardhurat e deklaruara të Musliut me vlerën e investimit? A janë deklaruar të gjitha interesat afariste dhe a ekzistojnë lidhje të ndaluara nga koha kur ai ka ushtruar funksionin publik?

Musliu të thotë nëse mund të shpjegojë prejardhjen e mjeteve për ndërtimin. Të kontrollohet gjendja pasurore dhe të ardhurat e deklaruara.

Është e nevojshme të hetohet nëse ekziston konflikt interesi ose lidhje me punën e tij të mëparshme zyrtare.

Institucionet kompetente të kryejnë kontroll të dokumentacionit, financimit dhe ligjshmërisë së investimit.

Prokuroria Publike dhe Komisioni Shtetëror për Parandalimin e Korrupsionit nuk duhet të mbeten vëzhgues të heshtur.

Qytetarët kanë të drejtë të dinë nëse personat që kanë ushtruar funksione të larta publike mund të justifikojnë pasurinë e tyre me të ardhura të fituara ligjërisht.

Nuk ka të paprekshëm. Nuk ka të privilegjuar. Ligjet duhet të vlejnë njësoj për të gjithë", thuhet në njoftimin e partisë.