Numri i të sëmurëve nga gripi pothuajse është dyfishuar brenda një jave, rastet më të shumta në Tetovë
Në Maqedoni në periudhën nga 26 tetori deri më 1 nëntor janë raportuar 116 raste të gripit dhe sëmundjeve të ngjashme me gripin, që përbën një rritje prej 90.2 për qind në krahasim me javën e kaluar, kur ishin regjistruar 61 raste, tregon raporti më i fundit i Institutit të Shëndetit Publik (IShP).
Në krahasim me të njëjtën periudhë të sezonit të kaluar, kur ishin regjistruar 94 persona të sëmurë, numri i rasteve është rritur për 23.4 për qind.
Numri më i madh i të sëmurëve gjatë javës së kaluar është raportuar në Tetovë – 48, Kumanovë – 26 dhe Shkup – 13. Në Prilep dhe Gostivar janë regjistruar nga shtatë raste, në Ohër dhe Negotinë nga tre, në Strumicë, Veles dhe Bitola nga dy, ndërsa në Radovish një rast.
Sipas grupeve të moshës, pjesa më e madhe e të sëmurëve janë në moshën nga 15 deri në 64 vjeç – 84 persona, ndërsa 25 janë mbi 65 vjeç, dhe shtatë janë fëmijë në moshën nga pesë deri në 14 vjeç.
Që nga fillimi i sezonit 2026/2027 janë regjistruar gjithsej 343 raste të gripit dhe sëmundjeve të ngjashme me gripin, që është 1.5 për qind më shumë në krahasim me të njëjtën periudhë të sezonit të kaluar. Numri më i madh i të sëmurëve, gjithsej 127, është regjistruar në Tetovë.
Në laboratorin virologjik të IShP-së gjatë javës së fundit të raportimit janë testuar 47 mostra, prej të cilave katër kanë rezultuar pozitive për virusin e gripit, dhe një për koronavirusin SARS-CoV-2.
Instituti thekson se, pavarësisht rritjes së numrit të rasteve, aktiviteti i gripit është ende në nivel ndërsezonal dhe nuk është arritur pragu epidemiologjik për fillimin e sezonit të gripit.
Instituti thekson se, pavarësisht rritjes së numrit të rasteve, aktiviteti i gripit është ende në nivel ndërsezonal dhe nuk është arritur pragu epidemiologjik për fillimin e sezonit të gripit.
Rekomandime për mbrojtje nga gripi
IShP rekomandon shmangien e kontaktit të ngushtë me persona që kanë simptoma të infeksioneve respiratore, si kollitje, teshtitje dhe temperaturë të lartë trupore, si dhe shmangien e qëndrimit në ambiente me shumë njerëz.
Nga masat e rekomanduara janë larja e rregullt e duarve me ujë dhe sapun ose përdorimi i dezinfektantit, ajrosja e shpeshtë e ambienteve, veshja e përshtatshme dhe konsumimi i mjaftueshëm i lëngjeve. Rekomandohet gjithashtu një dietë e larmishme e pasur me vitamina dhe minerale, gjumë i mjaftueshëm, pushim dhe aktivitet fizik.
Për personat që sëmuren nga gripi, IShP rekomandon të qëndrojnë në shtëpi, të shmangin kontaktet me persona të tjerë dhe të konsumojnë mjaftueshëm lëngje. Gjatë kollitjes dhe teshtitjes duhet të mbulojnë hundën dhe gojën, të mbajnë higjienën e duarve dhe të përdorin maskë mbrojtëse gjatë kontaktit me anëtarët e familjes.
Personat mbi 65 vjeç, ata me sëmundje kronike, si dhe personat tek të cilët simptomat përkeqësohen ose zgjasin më shumë ditë duhet të kërkojnë ndihmë mjekësore.
Vaksinimi kundër gripit rekomandohet veçanërisht për gratë shtatzëna, personat e moshuar, fëmijët e vegjël dhe personat me sëmundje kronike
Instituti kujton se vaksinimi është mbrojtja më efektive kundër gripit sezonal, veçanërisht për grupet me rrezik, në të cilat përfshihen personat mbi 65 vjeç, fëmijët në moshën nga gjashtë deri në 59 muaj, personat me sëmundje kronike, gratë shtatzëna dhe punonjësit shëndetësorë.
Vaksinimi në Maqedoni filloi më 21 tetor dhe po kryhet në qendrat për shëndet publik, njësitë e tyre rajonale dhe shtëpitë shëndetësore. Rezervimi për vaksinat falas bëhet përmes faqes së internetit www.vakcinacija.mk.
Sipas të dhënave nga Administrata e Shëndetësisë Elektronike, deri në mbylljen e raportit, me vaksina falas kundër gripit sezonal janë vaksinuar gjithsej 11,629 persona nga kategoritë me rrezik të popullsisë.
