Përgjegjësi për çdo vendim, llogaridhënie për çdo denar, paralajmëroi Gjorgjievski

Kryetari i Komunës së Shkupit, Orcë Gjorgjievski dhe përfaqësues nga administrata komunale, sot mbajtën një takim me përfaqësues të GRECO-s (Grupi i Shteteve Kundër Korrupsionit), i përkushtuar parandalimit të korrupsionit dhe forcimit të integritetit dhe llogaridhënies në nivel lokal.

– Si kryetar i Shkupit, theksova rëndësinë e bashkëpunimit institucional dhe shkëmbimit të praktikave të mira për menaxhim të ndershëm dhe të përgjegjshëm të fondeve publike. Besimi i qytetarëve fitohet me punë, me procedura të qarta dhe me gatishmërinë për të dhënë llogari për çdo vendim të marrë. Qytetarët kanë të drejtë të dinë se si planifikohen dhe ku shpenzohen paratë e tyre – tha Gjorgjievski

Në takim u diskutua për përgjegjësi më të madhe të shërbimeve dhe kryetarëve të komunave, si dhe për përfshirje aktive të sektorit joqeveritar në përgatitjen e planeve financiare dhe buxheteve.

Kryetari Gjorgjievski theksoi se Komuna e Shkupit punon me përkushtim në krijimin e mjeteve digjitale si një nga mekanizmat më të fuqishëm për parandalimin e korrupsionit.

– Me procedura më të thjeshtuara, informacione më të aksesueshme dhe mundësi për ndjekjen e procedurave, krijojmë kushte për një administratë më transparente dhe më përgjegjëse. Fondet publike janë besim që duhet ta justifikojmë. Çdo ditë, me çdo vendim dhe me çdo veprim – tha Gjorgjievski.