(Video) Fajtorët për „Alta Banka“ janë në Qeveri, kërkohet hetim i menjëhershëm për Mickoskin, Slaveskin dhe Kochovskën, tha Kuzeska
Në Qeveri janë fajtorët kryesorë që lejuan „Alta Banka“ të hyjë në Maqedoni, me kapital të dyshimtë. LSDM-ja një vit më parë paralajmëroi për „Alta Banka“, se është një bankë pro-regjimore e krijuar nga klanet kriminale dhe larëse parash e Vuçiqit, theksoi Bogdanka Kuzeska, zëdhënëse e LSDM-së.
Tani, shtoi ajo, populli vuan dhe nuk mund të arrijë te paratë e tij.
„Ndërkohë këta në qeveri gënjejnë, ia hedhin përgjegjësinë njëri-tjetrit për t’u shpëtuar dhe përpiqen të fshehin skandalin. Trajko Slaveski thotë se ka pasur konsultime, Kochovska thotë se nuk ka pasur dhe nuk është informuar. Sa hapin gojën gënjejnë.
Këtu është procesverbali nga mbledhja e Qeverisë më 23 shtator 2025. Me propozim të Kochovskës, Qeveria e Mickoskit ka marrë vendime për marrjen e aksioneve nga Alta Banka AD Beograd në 16 institucione publike“.
Mickoski dhe Slaveski, vlerëson Kuzeska, e futën „Alta Bankën“ në Maqedoni, me, siç tha, kapital të dyshimtë, e cila tani është në falimentim, pa licencë dhe nën hetim për krim.
„Qeveria e Mickoskit i ka mundësuar të njëjtit Davor Macura të fitojë një paketë më të madhe aksionesh në kurriz të shtetit. Kujdes, aksione nga ndërmarrje shtetërore janë ofruar në interes të Macurës dhe Alta Bankës! Sot njerëzit nuk mund të marrin paratë e tyre. Radhë, ngarkesa, qytetarë nervozë, pasiguri. Për këtë duhet të ketë përgjegjësi! Tani ata që morën vendimet dëmtuese, që mundësuan hyrjen e Alta Bankës, paralajmërojnë shitjen te pronar i ri. Qëllimi është të fshihet puna, të mos zbulohet krimi“.
Kuzeska pyet, kush do të donte të merrte një bankë me një reputacion të tillë dhe një bankë që është nën dyshim për origjinën e kapitalit?
Qeveria, theksoi ajo, ushtron presion mbi blerës potencialë, një bankë të huaj dhe që nga pak ditë më parë edhe një bankë vendore.
Kërkoi që Prokuroria Publike të mos presë dhe të mos justifikohet se ka kohë.
„Nuk ka kohë, janë vonuar 11 muaj. Të hapet menjëherë hetim edhe për Mickoskin, Slaveskin dhe Kochovskën. Të përfshihet edhe Prokuroria Evropiane për të kontrolluar rrjedhën e të gjitha parave për Alta Bankën. Të gjithë të përfshirët në skandalin me „Alta Bankën“ të përgjigjen“.
