VMRO-DPMNE: Pendarovski pranoi se objekti në Vllajë i Errold Musliut, kush financion investimin milionësh?

"Stevo Pendarovski, me statusin e tij në Facebook, praktikisht konfirmoi se bëhet fjalë për objektin në Vllajë që lidhet me familjen e ish-drejtorit të Agjencisë së Zbulimit, Errold Musliu. Në vend që të japë përgjigje konkrete, Pendarovski u përpoq të devijojë temën me kundërsulme politike. Por, pyetjet kyçe mbeten pa përgjigje", thonë nga VMRO-DPMNE.

"Në Vllajë po ndërtohet një objekt banimi në të cilin si investitore përmendet Afrodita Musliu, bashkëshortja e Errold Musliut, bashkëpunëtor i ngushtë i Pendarovskit, të cilin ai e emëroi drejtor të Agjencisë së Zbulimit në vitin 2019.

Pyetja është e thjeshtë, nga vijnë milionat për këtë investim? A përputhen të ardhurat familjare të deklaruara të familjes Musliu me madhësinë e investimit? Kush siguron kapitalin dhe a ekzistojnë marrëdhënie biznesi apo financiare midis Stevo Pendarovskit dhe Errold Musliut lidhur me këtë projekt?

Gjithashtu, në vitin 2024 Afrodita Musliu, bashkëshortja e Errold Musliut, ka marrë një grant prej 620 mijë eurosh nga qeveria e atëhershme e LSDM-së, e cila ka nënshkruar një memorandum me një konsorcium organizatash joqeveritare, themeluese e të cilit është pikërisht bashkëshortja e Errold Musliut.

Pendarovski nuk mund t'i shmangë këto pyetje me sulme politike dhe përpjekje për të devijuar vëmendjen. Deklarata e tij hapi dilema shtesë. Pendarovski dhe Errold Musliu duhet të përgjigjen publikisht se kush financion ndërtimin e objektit banesor në Vllajë?

Nga cilat burime vijnë mjetet për investimin? A ekzistojnë marrëdhënie biznesi apo financiare midis Pendarovskit dhe Musliut?

A është dhënë dhe përdorur granti prej 620.000 eurosh në përputhje me procedurat dhe kriteret ligjore? Nga institucionet kompetente kërkojmë të verifikojnë të gjitha të dhënat relevante financiare dhe pronësore, si dhe ekzistencën e mundshme të konfliktit të interesit.

Mjaft me devijime politike dhe shmangie të përgjegjësisë. Ndërsa Filipçe flet për një grup kriminal të organizuar, pikërisht elita e LSDM-së dhe persona të afërt me LSDM-në, përfshirë klanin Zaev, ndërtojnë ndërtesa të larta në Dubai, blejnë aksione në kompani ajrore, shijojnë luks në jahte në Egje, investojnë në fotovoltaikë dhe ndërtojnë perandori.

Mjaft me privilegje dhe heshtje", thuhet në njoftimin e VMRO-DPMNE-së.