Banka Popullore: Komisioni Evropian konfirmon rezistencën e sektorit bankar dhe forcimin e stabilitetit financiar
"Në Raportin për vendin tonë për vitin 2026 Komisioni Evropian e vlerëson sektorin bankar si rezistent, me kapitalizim solid, cilësi të portofolit të kredisë dhe fitimprurje. Gjithashtu, vërehen aktivitetet e Bankës Popullore për forcimin e stabilitetit financiar dhe përshtatjen me standardet evropiane", njoftoi Banka Popullore.
"Në Raport theksohet se Banka Popullore mbetet e përkushtuar në drejtimin e politikës monetare brenda ruajtjes së stabilitetit të çmimeve, duke forcuar njëkohësisht instrumentet makroprudenciale dhe kornizën mbikëqyrëse. Janë ndërmarrë aktivitete për menaxhim më të mirë të likuiditetit, përmirësim të instrumentarëve monetarë dhe monitorim të rreziqeve klimatike. Me qëllim përshtatjen me rregulloret e BE-së, rekomandohet që vendi të forcojë pavarësinë financiare të Bankës Popullore.
Në kushte të rritjes së shpejtë të kredive për banesa dhe kredive për ndërtim, si dhe të çmimeve të pasurive të paluajtshme, Banka Popullore ka ashpërsuar masat makroprudenciale për kreditimin, përfshirë edhe kreditë e siguruara me pasuri të paluajtshme, ka bërë ndryshime në rezervën e detyrueshme dhe ka rritur normën e shtresës mbrojtëse kundër ciklit të kapitalit. Këto aktivitete synojnë kufizimin e rreziqeve dhe ruajtjen e rezistencës së sektorit bankar", thanë nga BP.
"Komisioni Evropian konfirmoi gjithashtu përparimin në përshtatjen me kornizën rregullatore evropiane. Ligji për zgjidhjen e bankave, i përshtatur me kornizën evropiane për zgjidhjen dhe forcimin e institucioneve kredituese, hyri në fuqi në qershor 2026, gjë që në Raport vlerësohet si një hap i rëndësishëm përpara. Në korrik u miratua edhe një metodologji e re për menaxhimin e rrezikut nga normat e interesit në portofolin e aktiviteteve bankare.
Është arritur përparim edhe në fushën e pagesave. Vendi është operativisht i përgatitur për pjesëmarrje në skemat SEPA nga tetori 2025, ndërsa në korrik 2026 Banka Popullore nënshkroi marrëveshjen me Këshillin Evropian të Pagesave për aderimin në skemën e transfertave të menjëhershme të kredisë (SEPA Instant Credit Transfer).
Vlerësimet e Komisionit Evropian konfirmojnë rezistencën e sektorit bankar vendas dhe përparimin e vazhdueshëm në forcimin e stabilitetit financiar. Banka Popullore do të vazhdojë edhe në të ardhmen të kontribuojë për ruajtjen e stabilitetit të çmimeve dhe financiar dhe për përshtatjen me rregulloret evropiane", shtohet në njoftimin e Bankës Popullore.
