Banka Popullore: Norma bazë e interesit mbetet në 4,25%
Bordi Ekzekutiv i Bankës Popullore dje mbajti një mbledhje të rregullt për politikën monetare, në të cilën u shqyrtuan treguesit më të fundit makroekonomikë nga ambienti i brendshëm dhe i jashtëm, zhvillimet më të fundit në tregjet financiare ndërkombëtare dhe vendase, si dhe vlerësimet nga parashikimet më të fundit makroekonomike afatmesme.
Në këtë mbledhje Bordi Ekzekutiv vendosi të mbajë normën bazë të interesit në nivelin prej 4,25%, në përputhje me kushtet aktuale ekonomike, parashikimet më të fundit makroekonomike dhe rreziqet e vlerësuara nga ambienti i jashtëm dhe i brendshëm.
"Pavarësisht stabilitetit të tregut valutor dhe ngadalësimit të inflacionit, u vlerësua se është e nevojshme kohë për të parë qëndrueshmërinë e këtyre lëvizjeve, duke pasur parasysh pasigurinë e lartë në ambientin e jashtëm. Konkretisht, tensionet gjeopolitike, veçanërisht eskalimi në Lindjen e Mesme dhe vazhdimi i luftës në Ukrainë, kontribuan në rritjen shtesë të çmimeve të naftës dhe energjenteve të tjera, si dhe në shqetësime në zinxhirët e furnizimit, të cilat mund të ndikojnë në tregun valutor dhe çmimet vendase në periudhën e ardhshme. Përveç kësaj, faktorët vendas që mbështesin kërkesën dhe krijojnë rreziqe për dinamikën e ardhshme të inflacionit mbeten të pranishëm. Në këto kushte, Bordi Ekzekutiv vlerësoi se politika monetare aktuale është e përshtatshme, ndërsa pasiguria dhe paparashikueshmëria e lartë tregojnë nevojën për një qasje të kujdesshme", njoftuan nga Banka Popullore.
Nga aty njoftuan se mbajtja e normës bazë të interesit, së bashku me masat e marra në fushën e rezervës së detyrueshme dhe politikës makroprudenciale, do të kontribuojë në ruajtjen e stabilitetit të kursit të këmbimit të denarit ndaj euros, stabilizimin afatgjatë të inflacionit dhe forcimin e pritshmërive inflacioniste, dhe do të ndikojë në mënyrë të përshtatshme edhe në kushtet e kreditimit në ekonomi. Në mbledhjen e fundit në tetor, Banka Qendrore Evropiane gjithashtu mbajti normat e interesit të pandryshuara, duke vlerësuar se rreziqet lidhur me çmimet e energjisë mbeten të pranishme, ndërsa inflacioni bazë mbetet relativisht stabil dhe për momentin nuk vërehen presione të rëndësishme nga pagat.
Në mbledhje u konstatua se gjendja në tregun valutor është stabile.
"Që nga fillimi i majit, tregu valutor është stabil, dhe Banka Popullore ndërhyn me blerje valutash në pjesën më të madhe të tremujorit të tretë. Niveli i rezervave valutore në fund të shtatorit është 5.024 milion euro dhe mbahen në zonën e sigurt në përputhje me treguesit e përshtatshmërisë. Parashikimet më të fundit për pozicionin e jashtëm tregojnë një deficit të llogarisë aktuale prej 5,7% të PBB-së në vitin 2026, që përbën thellim në krahasim me vitin e mëparshëm, në kushte të një ambienti ndërkombëtar të paqëndrueshëm dhe çmimeve të larta të energjenteve në bursat botërore. Afatmesëm, për periudhën 2027 ‒ 2029, parashikohet ngushtim gradual i deficitit, në nivel prej 2,6% të PBB-së në vitin 2029. Pritet që rrjedhat financiare të jenë solide gjatë periudhës së parashikimeve, duke siguruar financimin e deficitit dhe rritjen e rezervave valutore", thuhet në njoftim.
Në të shtohet se në shtator, norma vjetore e inflacionit mbeti në një nivel relativisht të moderuar prej 2,7%, por efektet e rritjes së çmimeve botërore të energjenteve mbi inflacionin vendas po bëhen të dukshme përmes përshpejtimit të komponentit energjetik të inflacionit.
"Përshpejtim vërehet edhe në komponentin ushqimor, ndërsa inflacioni bazë ngadalësohet. Parashikimet më të fundit për çmimet bursore të produkteve primare për periudhën e ardhshme janë rishikuar në rritje, që tregon presione më të mëdha të çmimeve të importeve mbi çmimet vendase në periudhën e ardhshme. Sipas parashikimeve më të fundit, pritet që inflacioni në vitin 2026 të ngadalësohet në 3,6% dhe të vazhdojë përshtatjen në rënie dhe kthimin drejt mesatares historike. Për rrjedhojë, inflacioni do të ulet në 3,4% në vitin 2027, 2,2% në vitin 2028 dhe 2,0% afatmesëm. Stabilizimi gradual i inflacionit afatmesëm do të vijë nga stabilizimi i çmimeve të importeve, pritshmëritë e ankoruara inflacioniste dhe presionet e kufizuara nga kërkesa e brendshme", thuhet në njoftim.
Nga Banka Popullore thonë se ekonomia vendase mbetet rezistente pavarësisht ambientit të pasigurt dhe të ndryshueshëm të jashtëm.
"Në gjysmën e parë të vitit 2026, rritja reale vjetore e PBB-së arriti në 3,7%, pak më shumë se pritshmëritë. Të dhënat me frekuencë të lartë për tremujorin e tretë të vitit 2026 tregojnë për rritje të mëtejshme, por me dinamikë të moderuar të ngadaltë. Sipas rezultateve më të mira në gjysmën e parë të vitit, parashikimet e reja tregojnë përshpejtim të moderuar të rritjes së PBB-së, me norma prej 3,8% në vitin 2026 dhe 4% afatmesëm, me vlerësime të pandryshuara për faktorët themelorë të rritjes. Në kushte të një cikli të përforcuar investimesh publike në infrastrukturën rrugore dhe energjetike, pritet që investimet të jenë motor kryesor i rritjes, i cili do të mbështetet më tej nga konsumi vendas dhe aktiviteti eksportues", thonë nga Banka Popullore.
Gjithashtu, normat e rritjes së depozitave dhe kredive të bankave, deri në shtator, tregojnë për forcim të mëtejshëm të bazës së depozitave të bankave dhe mbështetje më të fortë kredie për aktivitetin ekonomik.
"Bazuar në lëvizjet aktuale, deri në fund të vitit 2026 pritet rritje e depozitave prej 7,8% dhe rritje e kredive prej 12,8%. Afatmesëm, për periudhën 2027 − 2029 parashikohet ngadalësim i moderuar i rritjes mesatare, që do të jetë rreth 7,7% për depozitat dhe 7,5% për kreditë, duke siguruar mbështetje të mëtejshme të qëndrueshme të ekonomisë përmes sektorit bankar", thonë nga Banka Popullore.
