Përgatituni për ndryshime të mëdha: A është Apple i detyruar të bëjë një hap historik?
Rregullatori britanik kërkon nga Apple që t'u mundësojë aplikacioneve të tjera akses në teknologjinë e tij NFC dhe të ulë tarifat që aplikon. Çfarë do të thotë kjo për përdoruesit dhe cili është përgjigjja e gjigantit teknologjik?
Mbretëria e Bashkuar ka vënë në shënjestër monopolizmin e Apple mbi pagesat pa kontakt NFC (Near-Field Communication) përmes telefonave inteligjentë, thuhet në propozimin e ri të Autoritetit për Konkurrencë dhe Tregje (CMA). Duke theksuar se "tarifat dhe rregullat e Apple pengojnë kompanitë fintech dhe bizneset e tjera në Mbretërinë e Bashkuar të inovojnë dhe të rriten", rregullatori nënvizon se dëshiron "kosto shumë më të ulëta" dhe që Apple të hapë standardet e tij të mbyllura.
CMA shprehu shqetësimet e saj lidhur me sistemin e pagesave NFC të Apple, duke theksuar se Mbretëria e Bashkuar është një qendër kryesore për industrinë fintech, që mbështet më shumë se 360,000 vende pune. Për më tepër, thuhet se 39 për qind e të gjitha pagesave në Mbretërinë e Bashkuar tani bëhen duke përdorur teknologjinë pa kontakt, ku Apple Wallet është zgjedhja më popullore. Megjithatë, rregullatori vuri re se tarifat dhe rregullat e Apple për akses në teknologjinë NFC "sjellin rrezik për të penguar mundësinë [e kompanive fintech] për inovacion dhe rritje" për shkak të kostove dhe kushteve "të ngarkuara" për akses. Më tej, në dallim nga Bashkimi Evropian, "asnjë kompani në Mbretërinë e Bashkuar nuk ka lansuar një produkt të tipit portofol digjital që do të konkurrojë me atë të Apple", theksojnë nga CMA.
Duket se CMA mbështet një zgjidhje të ngjashme me atë që është në fuqi në Evropë. Në vitin 2024, Apple u angazhua t'u mundësojë zhvilluesve akses në teknologjinë NFC që përdoret për pagesat pa kontakt, si dhe në funksionet e iOS, si autentikimi përmes Face ID dhe autorizimi i pagesës me dy klikime. Ky marrëveshje e shpëtoi Apple nga gjoba të mundshme antimonopol, që mund të arrinin deri në 10 për qind të xhiros së tij globale vjetore. Më vonë, duke filluar me iOS 18.1, Apple zgjeroi aksesin në këto funksione edhe për palët e treta në rajone të tjera.
Zhvilluesit në Mbretërinë e Bashkuar gjithashtu kanë akses në këto funksione; megjithatë, në dallim nga Evropa, ata mbeten "të bllokuar" në ekosistemin e Apple dhe janë subjekt i pagesës së tarifave. Për ta zgjidhur këtë, CMA propozon që Apple të mundësojë akses në "Wallet" (portofolin digjital) të tij për "standardet kryesore ndërkombëtare të pagesave pa kontakt", duke i mundësuar kështu kompanive nga Mbretëria e Bashkuar të ofrojnë shërbime pagese që tashmë janë të disponueshme në BE. Rregullatori theksoi se provat në dispozicion tregojnë se "asnjë nga këto teknologji nuk sjell rreziqe të brendshme sigurie".
Më tej, qëllimi është të sigurohet që akses në shërbimet e Apple të jetë "komercialisht i përballueshëm". Në vend që vetë të përcaktojë çmimet, CMA ka për qëllim të "propozojë parime" për përcaktimin e këtyre tarifave, duke pritur që kostot të jenë "ndjeshëm më të ulëta" se çmimet aktuale që aplikon Apple.
Periudha e konsultimeve publike përfundon më 17 nëntor 2026, dhe vendimi përfundimtar do të merret pas shqyrtimit të përgjigjeve të marra. Apple tashmë ka paraqitur ankesë, siç thuhet në deklaratën e mëposhtme:
"Apple i ka mundësuar zhvilluesve në Mbretërinë e Bashkuar dhe në mbarë botën të ofrojnë në mënyrë të sigurt transaksione pa kontakt direkt brenda aplikacioneve të tyre, përmes platformave NFC dhe SE – duke përfshirë gjithçka, nga pagesat në dyqane dhe biletat për transportin publik, deri te çelësat e makinave dhe biletat për ngjarje. Kjo zgjidhje u mundëson zhvilluesve dhe bankave të krijojnë produkte dhe shërbime inovative për përdoruesit e tyre dhe nxit konkurrencën midis portofolëve digjitalë, duke siguruar njëkohësisht që të dhënat e ndjeshme të përdoruesve mbeten të mbrojtura sipas standardeve më të larta të sigurisë.
Mendojmë se CMA nuk duhet të kërkojë nga Apple të adoptojë një qasje që ofron një nivel më të ulët të mbrojtjes së privatësisë dhe sigurisë. Ne do të vazhdojmë të bashkëpunojmë në mënyrë konstruktive për të arritur një rezultat që është në interesin më të mirë të përdoruesve tanë."
