(VIDEO) Shitur me çmim rekord: Kompjuteri i vjetër Apple i solli një milion dollarë
Tek kompjuteri Apple I është bashkangjitur një letër nga Steve Jobs, në të cilën ai e pyet pronarin nëse dëshiron të bëjë një përmirësim të modelit Apple II.
Kompjuteri i njohur Apple I Hatfield dhe i nënshkruar nga Steve Wozniak është shitur së fundmi tek një blerës anonim për një shumë rekord prej 1.148.200 dollarësh, sipas shtëpisë së ankandeve Bonhams.
Kjo pajisje, e prodhuar në vitin 1976 dhe fillimisht e shitur për 666.60 dollarë tek një person me emrin Fred Hatfield, është një nga vetëm 74 kopjet e konfirmuara të ruajtura të Apple I (e regjistruar nën numrin 48 në regjistër) dhe një nga të rrallat që janë ende në gjendje funksionale.
Përveç nënshkrimit të Wozniak, tek kompjuteri ka edhe një letër nga Steve Jobs në të cilën ai inkurajon Hatfield të dërgojë pllakën amë për përmirësimin e modelit Apple II. Blerësi gjithashtu merr manualin origjinal të përdorimit të Apple I, udhëzime për përdorimin e kasetave, ftesë për t'u anëtarësuar në "Klubin e pronarëve të Apple I", si dhe një njësi të përshtatur furnizimi me energji, së bashku me monitor dhe tastiera që i përkasin asaj periudhe kohore.
Herën e fundit kur ky shembull i veçantë u shfaq në ankand — në vitin 2013 — u shit për 671.400 dollarë. Për të shkaktuar më shumë interes, Bonhams muajin e kaluar e njoftoi publikisht ankandin dhe e ekspozoi kompjuterin në New York. Sipas informacioneve, ofertimi u përqendrua në dy individë, të cilët ngritën çmimin ndjeshëm mbi maksimumin e pritur prej 800.000 dollarësh.
"Jemi të entuziazmuar nga ky rezultat i jashtëzakonshëm për Apple I Hatfield, i cili përfaqëson një nga kthesat më të rëndësishme në historinë e teknologjisë kompjuterike", tha Ian Elling nga shtëpia e ankandeve Bonhams për Apple Insider. "Ishte nder të ofrohej produkti i parë i 'Apple' pikërisht në vitin kur kompania shënon 50-vjetorin e saj."
Apple I nuk ishte aspak një kompjuter i përshtatur për përdoruesin mesatar; madje nuk kishte as një njësi furnizimi me energji, e lëre më tastierë apo monitor. Kjo pajisje shitej me 8 KB RAM dhe mikroprocesorin MOS Technology 6502 – mjaftueshëm për të ekzekutuar gjuhën programuese Apple Integer Basic dhe disa lojëra, përmes ndërfaqes opsionale të kasetave (Apple Cassette Interface).
Letrën në të cilën Jobs ofron përmirësimin për Apple II është ajo që e bën këtë shembull të veçantë të Apple I veçanërisht interesant. "Letrat dëshmojnë sa shumë Jobs dhe Wozniak ishin të përfshirë personalisht në ditët e hershme të Apple – ata kujdeseshin për gjithçka, nga dizajni dhe prodhimi i produkteve, deri te mbështetja për përdoruesit", shpjegojnë nga shtëpia e ankandeve Bonhams në faqen e ankandit.
Fatmirësisht, Hatfield refuzoi ofertën për përmirësim dhe në fund e shiti makinën për 40.000 dollarë. Dihet se paratë i shpenzoi për darka luksoze dhe dalje nate në rrugën Frenchmen në qytetin e tij të lindjes New Orleans. "Mendova, pse të mos shijoj paratë që mora nga ajo makinë e vjetër", tha ai për gazetën The New York Times që në vitin 2013.
