Reddit padit Australinë për ndalimin e përdorimit të rrjeteve sociale nga fëmijët
Ndalimi i parë në botë për përdorimin e rrjeteve sociale nga adoleshentët, i vendosur në Australi, është "keq konceptuar" dhe përbën "një kufizim serioz të diskursit politik". Këtë e deklaroi një avokat i Reddit para Gjykatës së Lartë, në kuadër të sfidës së parë ligjore kundër këtij ligji, raporton Reuters.
Reddit, së bashku me një shoqatë libertariane, ka paraqitur padi në gjykatë duke kërkuar heqjen e ligjit, i cili ndalon platformat e mëdha t'u lejojnë personave nën 16 vjeç të krijojnë llogari përdoruesish. Rregullorja pritet të hyjë në fuqi në fund të vitit 2025; ajo ka marrë mbështetje nga grupet për mbrojtjen e prindërve, por ka hasur edhe kundërshtime të forta nga kompanitë teknologjike.
Kushtetutshmëria dhe përfshirja e ligjit
Paditësit pretendojnë se ligji duhet të shpallet i pavlefshëm pasi shkel lirinë kushtetuese të shprehjes politike. Më tej, Reddit pretendon se ligji nuk duhet të aplikohet fare në platformën e tyre, duke theksuar se Reddit-i nuk ka disa karakteristika kyçe tipike për rrjetet sociale, si varësia nga një rrjet miqsh.
Sfidimi i suksesshëm ligjor mund të nxisë rezistencë shtesë nga kompanitë e përfshira dhe të ngadalësojë miratimin e rregulloreve të ngjashme në nivel global. Ligjvënës në vende nga Mbretëria e Bashkuar deri në Malajzi po shqyrtojnë masa të ngjashme që synojnë mbrojtjen e shëndetit mendor dhe fizik të të rinjve. Qeveria australiane dhe ministrja e komunikimeve Anika Wells – e cila është e përmendur si pala e paditur në proces – kanë njoftuar se do ta mbrojnë ligjin.
Duke iu drejtuar këshillit gjyqësor me shtatë anëtarë, përfaqësuesi i Reddit, Perry Herzfeld, deklaroi se ndalimi i posedimit të llogarive për personat nën 16 vjeç i pengon të rinjtë të krijojnë përmbajtje dhe të ndërveprojnë me to. Ai i përshkroi këto platforma si mjetin më të rëndësishëm të komunikimit në botën moderne. "Kjo përbën një kufizim shumë serioz të diskursit politik në Australi", tha Herzfeld. "Tani ekziston një kufizim i konsiderueshëm në lidhje me atë që u lejohet të rinjve të bëjnë."
Herzfeld theksoi se, megjithëse Reddit mbështet qëllimin për të reduktuar dëmet, ai mendon se rregullorja ligjore dështon në arritjen e këtij qëllimi. Ai e përshkroi rregulloren si keq konceptuar dhe të gabuar në drejtim. Shpjegoi se ligji nuk përcakton masa konkrete për përjashtimin e të miturve, ndërsa njëkohësisht nuk vendos kufizime për shërbime të tjera online – si platformat e lojërave video – ku gjithashtu ndodhin raste abuzimi.
Edhe pse përmbajtjet në rrjetet sociale zakonisht mund t'i krijojnë ose komentojnë vetëm përdoruesit me llogari, Herzfeld shtoi se një pjesë e madhe e materialeve është e dukshme edhe për njerëzit pa llogari. "Nëse shteti është i shqetësuar për disa karakteristika të rrjeteve sociale, ai duhet t'i rregullojë ato karakteristika – gjë që në këtë rast nuk e ka bërë", përfundoi Herzfeld.
