Komuna e Kriva Pallankës: Lëvizja e pakontrolluar e bagëtisë së madhe shkakton dëme serioze, kërkohet plan operativ dhe veprim sipas vendimeve të formës së prerë nga AHV-ja
"Shtabi komunal i krizës i rekomandon Qeverisë të shpallë gjendje krize 30-ditore në territorin e Komunës së Kriva Pallankës, duke siguruar burime shtesë dhe duke aktivizuar mekanizmat ligjorë të parashikuar për zgjidhjen e plotë dhe të qëndrueshme të problemit shumëvjeçar me lëvizjen e pakontrolluar të bagëtisë së madhe", thonë nga Komuna e Kriva Pallankës.
"Rekomandimi u nxorr nga takimi i parë i Shtabit komunal të krizës për këtë problematikë, i mbajtur dje, më 2 nëntor, ku u shqyrtua gjendja aktuale dhe u përcaktuan detyra dhe masa konkrete për veprim.
Sipas informacionit të paraqitur në takim, më shumë se 1.000 krerë bagëti lëvizin pa kontroll në territorin e komunës, shkatërrojnë kultura bujqësore dhe dëmtojnë pronë private dhe komunale. Qytetarët, veçanërisht bujqit, çdo ditë pësojnë dëme materiale serioze dhe humbje financiare.
Shtabi i krizës vlerësoi se kapacitetet e disponueshme të Agjencisë për Ushqim dhe Veterinari dhe Agjencisë për Menaxhimin e Pronës së Sekuestruar janë të pamjaftueshme në raport me përmasën e problemit. Prandaj, kërkohet nga Qeveria që përmes gjendjes së propozuar të krizës të sigurojë staf shtesë, pajisje, mjete financiare dhe një plan operativ të koordinuar me përgjegjësi dhe afate të qarta.
Veç rekomandimit për Qeverinë, nga AHV-ja kërkohet që brenda një jave nga takimi të dorëzojë një plan operativ për zbatimin e vendimeve ekzistuese të formës së prerë dhe ekzekutive nga viti 2024 dhe të ndërmarrë aktivitete konkrete në terren për zbatimin e tyre.
Plani duhet të përmbajë orarin e aksioneve sipas ditëve dhe lokacioneve, personat përgjegjës, numër të mjaftueshëm ekipe profesionale dhe automjete të specializuara, si dhe kushtet e siguruara për kapjen, transportin dhe strehimin e bagëtisë që përfshihet nga vendimet. Aksionet duhet të zhvillohen në koordinim me institucionet kompetente, me prezencë të dukshme policore dhe asistencë, si dhe në bashkëpunim me banorët lokalë.
Afati për dorëzimin e planit nuk nënkupton shtyrje të veprimeve ndërkohë. Zbatimi i vendimeve ekzistuese nuk është i kushtëzuar me shpalljen e gjendjes së krizës dhe nuk duhet të presë vendimin e Qeverisë", njofton Komuna e Kriva Pallankës.
"Nëse brenda afatit të përcaktuar AHV-ja nuk dorëzon plan operativ dhe nuk ndërmerr veprime konkrete për zbatimin e vendimeve, Komuna e Kriva Pallankës dhe një grup qytetarësh të dëmtuar nga komunitetet lokale do të paraqesin kallëzim penal në Prokurorinë Themelore kompetente, për hetimin e përgjegjësisë penale të zyrtarëve përgjegjës në AHV për mosveprim dhe punë të pakujdesshme në shërbim.
Komuna do të paraqesë gjithashtu kallëzim në Inspektoratin Shtetëror Administrativ, duke kërkuar mbikëqyrje të jashtëzakonshme inspektuese brenda kompetencave të tij, për të përcaktuar arsyet e moszbatimit të vendimeve të formës së prerë dhe ekzekutive nga viti 2024, me të cilat është vendosur masa e konfiskimit të kafshëve nga ferma të regjistruara.
Pavarësisht këtyre veprimeve, Komuna e Kriva Pallankës nga kjo javë vendos regjistrin unik të dëmeve të raportuara. Regjistri do të shërbejë për evidentimin dhe dokumentimin e dëmeve dhe përgatitjen për padinë e përbashkët të të dëmtuarve për kompensim dëmi para gjykatës kompetente, nëse plotësohen kushtet ligjore.
Të dëmtuarit duhet të plotësojnë formularin e raportimit, të bashkëngjisin provat në dispozicion dhe të angazhojnë një ekspert të pavarur që do të përgatisë gjetjet dhe opinionin për shumën e dëmit. Shpenzimet për procedurat gjyqësore të organizuara në kuadër të kësaj iniciative do të mbulohen nga Komuna e Kriva Pallankës.
Komuna kërkon veprim urgjent për vendimet ekzistuese dhe shqyrtim urgjent të rekomandimit për Qeverinë për mbështetje institucionale shtesë.
Qytetarët nuk duhet më të paguajnë çmimin e pakujdesisë institucionale dhe të mbeten vetëm me dëmet. Institucionet duhet të marrin përgjegjësinë dhe të veprojnë — pa vonesa të reja. Komuna e Kriva Pallankës do të qëndrojë pranë qytetarëve të saj deri në zgjidhjen përfundimtare të problemit", shtohet në njoftimin e Komunës.
