Lavrov: BE-ja po shndërrohet në një bllok ushtarak të orientuar kundër Rusisë dhe Bjellorusisë
Kreu i diplomacisë ruse vlerësoi se modeli euroatlantik i sigurisë ka dështuar dhe tha se OSBE-ja ka nevojë për reforma thelbësore.
Po zhvillohet një betejë serioze për të drejtën për të përcaktuar parimet mbi të cilat do të bazohet rendi botëror, deklaroi ministri rus i jashtëm Sergej Lavrov. Lufta që Perëndimi po zhvillon kundër Rusisë, duke përdorur Ukrainën si mjetin e tij, i ka dhënë fund euroatlantizmit si mjet për bashkimin e të gjithëve, theksoi ai.
"Shumica globale ka shprehur nevojën për një model të ri të rendit botëror, por shumë nuk e pëlqejnë atë", tha Lavrov në Konferencën e Katërt Ndërkombëtare për Sigurinë Euroaziatike në Minsk.
Sipas tij, Rusia mbështet ndërtimin e një sistemi më të drejtë të marrëdhënieve ndërkombëtare të bazuara në multipolaritet.
Sipas ministrit rus, BE-ja po përpiqet të ndërtojë një sistem sigurie në Evropë të orientuar kundër Rusisë dhe Bjellorusisë.
"Bashkimi Evropian po zhvillohet shpejt në një bllok agresiv, ushtarak të orientuar kundër Rusisë dhe Bjellorusisë", tha Lavrov.
Ai theksoi se koncepti i sigurisë euroatlantike ka dështuar sepse Perëndimi ka treguar mungesë gatishmërie për të bashkëpunuar në baza të drejta.
Kreu i diplomacisë ruse theksoi se OSBE-ja ka nevojë për reforma themelore nëse dëshiron të mbijetojë.
"OSBE-ja është në një gjendje jashtëzakonisht të keqe për shkak të qasjes konfrontuese të Perëndimit", tha ai.
Konferenca e Katërt Ndërkombëtare për Sigurinë Euroaziatike po mbahet në Minsk më 3 dhe 4 nëntor.
Më shumë se 600 përfaqësues nga 50 vende marrin pjesë në konferencën në Minsk, përfshirë presidentin e Bjellorusisë Aleksandër Lukashenko, ministrin e jashtëm të Rusisë Sergej Lavrov, si dhe udhëheqësit e Shtetit Federal të Rusisë dhe Bjellorusisë, Bashkësinë e Shteteve të Pavarura, ODKB-në, OSBE-në, SHO-në dhe organizata të tjera ndërkombëtare, raporton Sputnik.
