Sega tërheq lojën – fansat nuk duan AI slop

Sega tërhoqi lojën remaster Total War, pasi një numër i madh fansash kritikuan përdorimin e dukshëm të inteligjencës artificiale gjatë krijimit të saj.

Total War: Shogun 2 – Complete Edition u publikua së fundmi në platformën Steam, por Sega dhe studioja Creative Assembly nuk e përfunduan punën ashtu siç duhet.

Siç vunë re fansat, gjatë përgatitjes së kësaj versioni u përdor intensivisht AI gjeneruese – dhe në vend që të përmirësonte lojën, ajo e shndërroi atë në kaos. Pas kritikave të ashpra në rrjetet sociale, Sega vendosi ta tërheqë lojën dhe lëshoi një deklaratë lidhur me këtë.

"Jemi të vetëdijshëm që Total War: Shogun 2 – Complete Edition nuk i përmbushi pritshmëritë tuaja, as standardet tona. Pamë reagimet, komentet dhe rishikimet tuaja. Pajtohemi që përvoja aktuale nuk është në nivelin që duhet të jetë", thuhet në deklaratë.

"Si rezultat, po bashkëpunojmë me pronarët e platformës për ta tërhequr përkohësisht lojën nga shitja dhe për të rikthyer versionin origjinal, ndërsa shqyrtojmë problemet. Ata që tashmë e kanë lojën, do të mund të kenë akses dhe ta luajnë atë", shtohet më tej.

Fansat ishin veçanërisht të revoltuar sepse u premtua një version i përpunuar, por programuesit nuk bënë asnjë përpjekje serioze për ta përmirësuar vërtet lojën; në vend të kësaj, duket se u përpoqën të "fitonin lehtë" duke përdorur inteligjencën artificiale – duke tarifuar 10 dollarë më shumë për këtë version. Megjithatë, fansat e vërtetë nuk falin kaq lehtë, kështu që loja tani do të kthehet te ekipi zhvillues për punë shtesë.