OBSH: Çdo i katërti adoleshent është fizikisht joaktiv, vajzat lëvizin më pak se djemtë

Çdo i katërti i ri në moshë nga 11 deri në 17 vjeç nuk merret me sport ose aktivitete fizike që kontribuojnë në shëndetin e zemrës dhe enëve të gjakut, tregon raporti i ri i Organizatës Botërore të Shëndetësisë (OBSH), i publikuar dje.

Sipas raportit "Një brez që i mungon lëvizja – Tendencat globale në aktivitetin fizik të adoleshentëve 2010–2025", vetëm 14 për qind e të rinjve janë fizikisht aktivë të paktën një orë në ditë, me intensitet mesatar deri të lartë.

Hulumtimi ka përfshirë më shumë se tre milionë të anketuar në 140 vende dhe ka treguar se vajzat janë më pak fizikisht aktive se djemtë në pothuajse të gjitha vendet.

Madje 28 për qind e vajzave kanë deklaruar se gjatë javës së kaluar nuk kanë pasur asnjë ditë aktivitet fizik, krahasuar me 22 për qind të djemve.

OBSH paralajmëron se kjo tendencë është shqetësuese pasi adoleshenca është periudha kyçe për fitimin e zakoneve të shëndetshme që mbeten gjatë gjithë jetës.

Organizata thekson se një nga kufizimet e studimit janë interpretimet e ndryshme të aktivitetit fizik me intensitet mesatar dhe të lartë ndërmjet vendeve dhe kulturave.