Bardela rizgjedhet kryetar i Asamblesë Kombëtare franceze me 98,98 për qind të votave

Jordan Bardela mori një mandat të ri në krye të partisë opozitare franceze Asambleja Kombëtare, pasi në kongresin në Orlean u rizgjedh pa kundërkandidat. Ai njoftoi se do t'i ndihmojë Marin Le Pen të arrijë në Pallatin Elize në zgjedhjet presidenciale të vitit 2027.

Jordan Bardela sot u rizgjodh përsëri kryetar i partisë franceze Asambleja Kombëtare (Rassemblement National), duke fituar 98,98 për qind të votave në kongresin partiak në Orlean, qytet në jugperëndim të Parisit.

Bardela ishte kandidati i vetëm për këtë funksion, dhe pas rizgjedhjes para disa mijëra anëtarëve dhe mbështetësve të partisë tha se do t'i duhet mbështetja e tyre që Marin Le Pen të bëhet presidente e Francës.

"Për ta çuar Marin në Pallatin Elize, do të më duhet ju", deklaroi Bardela.

Ai është deputet në Parlamentin Evropian, dhe në krye të Asamblesë Kombëtare është që nga viti 2022. Partia u themelua në vitin 1972 dhe përfaqëson një nga forcat kryesore opozitare politike në Francë.

Bardela nesër do të mbajë një fjalim në sallën "Zenith d’Orléans", pas së cilit do t'u drejtohet të pranishmëve edhe Marin Le Pen, e cila është kandidate e partisë për zgjedhjet presidenciale të vitit 2027.

Rizgjedhja e Bardelës vjen në një periudhë kur partia po përgatitet për garën e ardhshme presidenciale, në të cilën Le Pen do të përpiqet përsëri të arrijë në funksionin më të lartë në Francë.