Biznesmeni bullgar dhe ish-eurodeputeti Slavi Binev u vra, tre persona të dyshuar u arrestuan

Biznesmeni bullgar, ish-eurodeputet dhe ish-kampion evropian në taekwondo, Slavi Binev (60), u vra këtë mëngjes në shtëpinë e tij në lagjen Pavlovo të Sofjes. Policia arrestoi tre persona të dyshuar, njoftuan autoritetet bullgare.

Sipas gazetës bullgare "Dnevnik", policia mori një raport për rastin rreth orës 10:20 me kohë lokale. Mediat bullgare raportuan se Binev u qëllua me armë zjarri, dhe tre të dyshuarit u arrestuan në autostradë. Sipas informacioneve, ata ishin të armatosur.

"Dnevnik" thekson se të dyshuarit njihnin Binevin dhe se është e mundur që vrasja të ketë lidhje me një mosmarrëveshje financiare. Deri tani, këto informacione nuk janë konfirmuar zyrtarisht si motiv i krimit.

Kjo është vrasja e dytë e një biznesmeni në Bullgari në muajin e fundit.

Binev ishte i njohur edhe për karrierën sportive. Në vitin 1992 fitoi titullin kampion evropian në taekwondo në Kampionatin e Hapur Evropian në Celje, Slloveni. Më vonë ishte edhe president i Federatës Bullgare të Taekwondo-s, dhe merrej edhe me politikë, si ish-deputet në Parlamentin Evropian.