Hegset kërkon transmetim publik të ekzekutimit të ish-majorit të ushtrisë amerikane, Trump tani shpreh dyshime

Donald Trump në mënyrë private ka shprehur dyshime për planin e Pentagonit për transmetim të drejtpërdrejtë të ekzekutimit të ish-majorit të ushtrisë amerikane, Nidal Hasan – i dënuar për vrasjen e 13 personave në Fort Hood në vitin 2009 – raporton „Axios“, duke u thirrur në katër bashkëbisedues të presidentit amerikan. Në ditët e fundit, Trump është përballur me kritika të gjera për idenë e transmetimit të ekzekutimit, si nga demokratët dhe republikanët, ashtu edhe nga këshilltarë brenda dhe jashtë Shtëpisë së Bardhë.

„Ndoshta nuk do të ndodhë“
Trump i ka thënë një personi jashtë administratës se transmetimi i ekzekutimit të Hasanit, i caktuar për 3 dhjetor, „ndoshta nuk“ do të realizohet. Një burim ka deklaruar për „Axios“ se Trump nuk ka dëgjuar shumë entuziast për idenë, prandaj në ditët e fundit ka kontaktuar njerëz për të dëgjuar mendimin e tyre.

Është parashikuar që Hasan të ekzekutohet nga një skuadër pushkatimi në Fort Hood. Nëse transmetimi realizohet, kjo do të ishte ekzekutimi i parë në SHBA që publiku do të mund ta ndjekë drejtpërdrejt në internet.

Hegset njoftoi transmetimin publik
Sekretari amerikan i Mbrojtjes, Pete Hegseth, javën e kaluar njoftoi se Pentagoni ka ndërmend të lejojë transmetimin publik të ekzekutimit. „Ne do t'u mundësojmë njerëzve ta shohin, të jetë publik, sepse njerëzit duhet të kuptojnë që ka pasoja serioze për këto gjëra“, tha Hegseth.

Kjo ide ka shkaktuar një dënim të gjerë në SHBA dhe jashtë saj. Të premten, Trump fillimisht e mbështeti plotësisht propozimin, duke thënë: „Absolutisht, e aprovoj“, por më vonë të njëjtën ditë e zbuti tonin. „Dëshirojnë ta bëjnë këtë sepse duan të japin një shembull. Unë nuk kam qenë i përfshirë në atë vendim, por e kuptoj“, tha Trump.

„Unë do të vendos“
Të shtunën, Trump deklaroi se ai do të marrë vendimin përfundimtar. „Ka dy pikëpamje: të mos transmetohet dhe të transmetohet. Sepse, e dini, nëse transmetohet, ndoshta njerëz të tjerë nuk do ta bëjnë atë që bëri ai. Në fund, unë do ta marr vendimin. E di çfarë dëshiron ushtria, por ne do të vendosim“, tha ai.

Zëvendëspresidenti J.D. Vance gjithashtu në këto ditë ka sugjeruar se është e mundur që transmetimi të mos ndodhë. Ai tha se nuk e di nëse kjo do të ndodhë vërtet dhe shtoi se personalisht nuk do ta shikonte.

Trump frikësohet se Hasan do të bëhet martir
Një bashkëpunëtor i Trump-it ka deklaruar për „Axios“ se presidenti dëshiron që Hasan të dënohet, por njëkohësisht nuk dëshiron që transmetimi publik ta shndërrojë atë në martir. „Presidenti dëshiron që ai të paguajë, dhe ekzekutimi publik mund të jetë një poshtërim shtesë që Hasan e meriton. Megjithatë, ai nuk dëshiron ta bëjë atë martir“, tha ai.

Një burim tjetër ka vënë në dyshim kuptimin e transmetimit, duke marrë parasysh gjendjen shëndetësore të Hasanit. Hasan ka mbetur i dëmtuar përjetësisht pas arrestimit të tij dhe përdor karrocë invalidi.