Koreja e Jugut tërheq ambasadorin nga Ukraina pas një mosmarrëveshjeje diplomatike me Kievin

Koreja e Jugut njoftoi se tërheq ambasadorin e saj nga Ukraina, pas mosmarrëveshjes diplomatike që shpërtheu midis dy vendeve pasi presidenti ukrainas, Volodymyr Zelensky, bëri të ditur publikisht se dy ushtarë të kapur nga Koreja e Veriut ishin transferuar në Seul.

Mosmarrëveshja filloi muajin e kaluar, kur Zelensky në fjalimin e tij para Asamblesë së Përgjithshme të Kombeve të Bashkuara zbuloi transferimin e ushtarëve që luftuan në anën e Rusisë. Seuli pretendon se me këtë është shkelur marrëveshja e besueshmërisë, ndërsa Kievi mohon ekzistencën e një marrëveshjeje të tillë.

Presidenti i Koresë së Jugut, Lee Jae-myung, e vlerësoi veprimin e Zelenskyt si një zhgënjim të madh, duke theksuar se bëhet fjalë për një çështje jashtëzakonisht të ndjeshme që prek sigurinë kombëtare. Administrata e tij shpjegoi se transferimi ishte mbajtur sekret edhe për mbrojtjen e familjeve të ushtarëve.

Tensionet u rritën më tej pas deklaratave të kundërta për një falje të pretenduar nga pala ukrainase. Ministri i Jashtëm i Koresë së Jugut, Cho Hyun, deklaroi se kishte marrë një falje, por që ajo nuk i plotësoi pritshmëritë e Seulit. Ministria e Jashtme e Ukrainës, nga ana tjetër, mohoi se ministri Andriy Sybiha kishte kërkuar falje.

Pas kësaj, Seuli kërkoi falje nga Kievi për, siç tha, shpërndarjen e pavërtetave, duke vlerësuar se kjo ka dëmtuar rëndë besimin midis dy vendeve.

Pavarësisht mosmarrëveshjes, Ministria e Jashtme e Koresë së Jugut njoftoi se do të vazhdojë konsultimet me Ukrainën dhe shprehu shpresën që çështjet e hapura do të zgjidhen pa vështirësi të mëtejshme.

Koreja e Jugut mbështet Ukrainën që nga fillimi i pushtimit rus, por deri tani ka refuzuar të dërgojë armë vdekjeprurëse. Në korrik njoftoi një paketë shtesë ndihme prej 100 milionë dollarësh.