Kreu i diplomacisë polake paralajmëroi Musk: Mos luani politikë me produktet tuaja

Kreu i diplomacisë polake, Radoslav Sikorski, paralajmëroi publikisht miliarderin amerikan dhe pronarin e kompanisë „SpaceX“, Elon Musk, pas informatave se forcat ukrainase kanë kufizuar disa mundësi për përdorimin e sistemit satelitor „Starlink“, nga i cili varen në masë të madhe komunikimet ushtarake dhe kontrolli i dronëve.

Sikorski iu drejtua Musk-ut përmes rrjetit social X, duke vënë në dyshim mundësinë që kufizimet të jenë vendosur për arsye politike.

„Hej, Elon Musk, njeri i madh, a po luan përsëri politikë me produktet e tua? Si klientët tuaj evropianë, po ju ndjekim“, tha Sikorski.

Mesazhi i tij erdhi pasi përfaqësues të forcave ukrainase raportuan se gjatë natës midis 13 dhe 14 tetorit pati kufizim të funksionimit të terminalit „Starlink“ gjatë lëvizjes me shpejtësi më të madhe se rreth 160 kilometra në orë.

Sergej Beskrestnov, këshilltar i presidentit ukrainas Volodymyr Zelenski për teknologjitë ushtarake, konfirmoi se kufizimi është vendosur pa njoftim paraprak për forcat e armatosura ukrainase.

Sipas tij, kufizimet lidhen me versionin ushtarak të sistemit satelitor, të njohur si „Starshield“, dhe disa operacione me dronë janë ndërprerë për shkak të humbjes së lidhjes.

Informacione të ngjashme prezantoi edhe aktivisti ukrainas Sergej Sternenko, i cili vlerësoi se ekziston mundësia që vendimi i kompanisë „SpaceX“ të jetë marrë në kërkesë të administratës së presidentit amerikan Donald Trump.

Sidoqoftë, deri tani nuk ka konfirmim që Uashingtoni ka urdhëruar vendosjen e këtyre kufizimeve, as „SpaceX“ nuk ka shpjeguar publikisht arsyet për këtë vendim, shkruajnë mediat.