"Kupola e Artë" e Trump shkon drejt Grenlandës: shumica e deputetëve mbështet marrëveshjen

Shumica e deputetëve në Grenlandë mbështetën marrëveshjen e sigurisë me Shtetet e Bashkuara, pavarësisht se përfaqësuesit e opozitës shprehën dyshime për përfitueshmërinë e saj ekonomike. Pritet që marrëveshja, e cila tani shkon për lexim të dytë dhe votim përfundimtar në parlament, të miratohet zyrtarisht, raporton Reuters.

SHBA, Danimarka dhe Grenlanda nënshkruan marrëveshjen muajin e kaluar për të qetësuar tensionet që lindën pasi presidenti amerikan Donald Trump shfaqi interes për të marrë kontrollin mbi ishullin strategjik arktik. Marrëveshja zgjeron rolin e ushtrisë amerikane në Grenlandë, duke mundësuar ndërtimin e dy bazave të reja ushtarake dhe vendosjen e sistemit të mbrojtjes me raketa të Trump, të njohur si "Kupola e Artë". Në të njëjtën kohë, marrëveshja konfirmon sovranitetin danez dhe të drejtën e popullit të Grenlandës për vetëvendosje.

Pele Broberg, kreu i partisë opozitare "Naleraq", deklaroi se shumë detaje praktike të marrëveshjes mbeten të paqarta. "Shteteve të Bashkuara u jepen të drejta të gjera në vendin tonë, por popullit të Grenlandës nuk i garantohet asnjë kompensim i caktuar për këto të drejta", tha Broberg gjatë debatit parlamentar në Nuuk.

Qëndrimi i partive në pushtet
Partitë në pushtet, që kanë shumicën parlamentare, mbrojtën marrëveshjen. Ish-ministrja e Punëve të Jashtme Vivian Mocfeld nga partia "Demokratët" theksoi se Grenlanda ka siguruar një mbrojtje të madhe pa asnjë kosto për veten, ndërsa njëkohësisht ka fituar njohje si një komb autonom. Ministri i Punëve të Jashtme Mute Egede shtoi se marrëveshja përbën një hap të madh përpara që nuk mund të matet vetëm me vlera monetare.

Eric Jensen, kreu i partisë "Siumut", gjithashtu shprehu mbështetjen e tij. "Për vite me radhë, 'Siumut' ka luftuar për të siguruar që marrëveshjet që lidhen me Grenlandën të mos mbyllen pa pjesëmarrjen tonë. Pikërisht për këtë jemi të kënaqur", përfundoi Jensen.