Lavrov: Nuk do të biem përsëri në kurth; Zelenski nuk meriton pushim

Ministri rus i Punëve të Jashtme, Sergej Lavrov, deklaroi se presidenti ukrainas Volodymyr Zelenski nuk meriton ndërprerje të armiqësive dhe se Rusia nuk do të bjerë pre e premtimeve të tij. Ai e tha këtë në një konferencë për shtyp pas bisedimeve me ministrin libanez të Punëve të Jashtme dhe Çështjeve të Diasporës, Youssef Radi.

"Nuk mendoj se ai meriton ndërprerje. Nuk besoj se do të biem përsëri në kurth nga garancitë dhe premtimet. Presidenti Vladimir Putin e ka bërë këtë të qartë. Ne vazhdojmë të realizojmë qëllimet e operacionit special ushtarak", tha Lavrov.

"Qëllimet tona janë të njohura mirë nga të gjithë. Ne kurrë nuk i kemi ndryshuar, ndryshe nga Zelenski dhe zotërinjtë e tij evropianë, të cilët vazhdimisht ndryshojnë drejtimin dhe qëndrimet. Prandaj, nuk kemi nevojë të justifikohemi para askujt", shtoi ai.

Zelenski kërkon armëpushim 60-ditor për zgjedhjet
Zelenski dje deklaroi se një armëpushim 60-ditor do t’i mundësonte vendit të tij të mbajë zgjedhjet presidenciale, pas vërejtjes së presidentit amerikan Donald Trump se është "koha që Ukraina të ketë një president të ri".

Zelenski theksoi se mbajtja e zgjedhjeve në këtë moment është "plotësisht e pamundur" për arsye sigurie, pasi sulmet ndodhin "ditë e natë". Ai bëri thirrje për "ndërprerje të plotë të zjarrit".

Sipas Lavrov, reagimi i Zelenskit tregon vetëm një gjë: "Ai dëshiron të shfrytëzojë të gjitha fjalët, të gjitha iniciativat dhe të gjitha idetë që shfaqen në publik për të avancuar interesat e tij dhe për të siguruar pushim me çdo kusht".

"Ekziston vetëm një qëllim, dhe ai është shumë i thjeshtë: të fitohet kohë dhe të sigurohet pushim. Ai tha se është madje i gatshëm të mbajë zgjedhje presidenciale nëse i jepen dy muaj për riorganizim. Gjatë kësaj periudhe, Europa mund ta furnizojë me armë të reja për të vazhduar luftën terroriste kundër popullit rus", përfundoi Lavrov.