Një avion australian u ul në Romë, pastaj u tërhoq nga përdorimi për shkak të një sulmi nga insektet e shtratit

Kompanisë ajrore australiane "Qantas" i është tërhequr nga qarkullimi një nga avionët e saj në Romë pasi u zbuluan insekte shtrati në kabinën e pasagjerëve. Këto parazitë u gjetën në fluturimin nga Perth në Romë, konfirmoi një burim i njohur me situatën, transmeton "The Guardian".

Insektet e shtratit u zbuluan katër ditë më parë në pjesën e përparme të kabinës së klasës ekonomike në avionin "Boeing 787 Dreamliner" që shërbente fluturimin QF5. Pas uljes në Romë, avioni u tërhoq menjëherë nga përdorimi për pastrim të thellë. Si pasojë, fluturimi i kthimit nga Roma në Perth, i planifikuar për 10 tetor, u anulua.

Një zëdhënës i "Qantas" konfirmoi se fluturimi u anulua për t'i mundësuar ekipeve teknike të kryejnë dezinfektimin, pasi u "konstatua një problem me një numër të vogël sediljesh në klasën ekonomike". Zëdhënësi deklaroi se kompania "ndjen keqardhje të sinqertë" ndaj pasagjerëve për shqetësimet.

"Mund të jenë futur përmes bagazhit ose rrobave të ndonjë pasagjeri"
Nga "Qantas" njoftuan se pasagjerëve të prekur u është siguruar akomodim dhe janë transferuar në fluturime të tjera brenda 48 orëve. Kompania theksoi se kabinat e avionëve pastrohen rregullisht sipas standardeve të larta, dhe dezinfektimi kryhet si masë parandaluese standarde çdo 50 ditë.

Profesoresha Michelle Power, parazitologe nga Universiteti "Macquarie", mendon se insektet e shtratit "me shumë gjasa" kanë hyrë në avion përmes bagazhit ose rrobave të ndonjë pasagjeri. "Ato lidhen me udhëtimet. Njerëzit mund të qëndrojnë në hotele të infektuara me insekte shtrati, dhe pasi insektet preferojnë vende të errëta dhe tërhiqen nga aroma e rrobave njerëzore, ato futen në bagazh", shpjegoi ajo.

Është e vështirë t’i hiqësh qafe.
"Këto janë insekte që nuk fluturojnë – të paktën jo pa avion", shtoi Power. Ajo theksoi se insektet e shtratit nuk janë të rrezikshme, megjithëse pickimet e tyre mund të shkaktojnë kruarje dhe irritim. Problemi është se është e vështirë t’i zhdukësh sepse mund të mbijetojnë gjatë pa ushqim, duke u fshehur në tekstile dhe çarje.

Sipas saj, problemi me insektet e shtratit ka "dy anë". Nga njëra anë janë njerëzit më të pasur që udhëtojnë shpesh dhe i përhapin. Nga ana tjetër janë individët që përballen me pabarazi shëndetësore dhe që ndoshta nuk mund të përballojnë pesticide ose ujë me temperaturë 55 gradë Celsius, të nevojshëm për t’i shkatërruar ato.