OBSH: Dy të tretat e të rinjve në Evropë kanë pasur përvoja të vështira në fëmijëri

Më shumë se dy të tretat e të rinjve në Evropë kanë përjetuar përvoja të vështira në fëmijëri, si dhunë familjare, keqpërdorim ose humbje të prindit, që mund të lënë pasoja afatgjata në shëndetin e tyre mendor dhe cilësinë e jetës, tregon një raport i ri i Zyrës Rajonale të Organizatës Botërore të Shëndetësisë (OBSH) për Evropën, transmeton "Euronews".

Hulumtimi, i kryer midis nëntorit 2025 dhe janarit 2026, përfshiu më shumë se 26,000 të rinj në moshë nga 18 deri në 30 vjeç. Sipas rezultateve, çdo i pesti i intervistuar ka përjetuar katër ose më shumë përvoja negative në fëmijëri.

Përvojat më të shpeshta ishin divorc ose vdekje e prindit, dëshmi e dhunës familjare dhe keqpërdorim emocional.

Raporti tregon se të rinjtë e ekspozuar ndaj më shumë përvojave traumatike kanë më shpesh probleme me shëndetin fizik dhe mendor, si dhe vështirësi në funksionimin e përditshëm.

Madje 76.3 për qind e të intervistuarve me katër ose më shumë përvoja negative mendonin se gjatë vitit të kaluar u nevojitej ndihmë profesionale psikologjike, në krahasim me 36.7 për qind të atyre që nuk kishin pasur të tilla përvoja. Në të njëjtën kohë, pikërisht të rinjtë më të prekur shpesh mbeteshin pa mbështetjen e nevojshme.

OBSH paralajmëron se pasojat e fëmijërisë së vështirë mund të transmetohen edhe në brezat e ardhshëm, por thekson se me parandalim në kohë, mbështetje psikologjike dhe krijimin e një mjedisi më të sigurt për fëmijët, pasojat negative mund të zbuten ndjeshëm.