Pas marrjes së dy injeksioneve vdekjeprurëse bëri hapat e parë: detaje të reja për Krista Pajk

Krista Pajk, e cila pati një përpjekje të dështuar për ekzekutim javën e kaluar në shtetin amerikan të Tenesit, tani është "ngritur në këmbë dhe ecën" nëpër dhomën e spitalit, tha një anëtar i ekipit të saj ligjor.

Pajk (50) u dënua me vdekje për vrasjen e Kolin Slemer në vitin 1995, të cilën e kreu së bashku me partnerin e saj në atë kohë. Ajo mbijetoi dy injeksione vdekjeprurëse gjatë përpjekjes për ekzekutim më 30 shtator, në atë që ekspertët e përshkruan si një rast pa precedent.

Avokati i saj, Stivën Ferel, tha për BBC-në se nuk ka biseduar drejtpërdrejt me Pajk, por ka mësuar se si ajo lëviz për herë të parë nëpër dhomën e spitalit. Megjithatë, ajo është ende mendërisht "e mjegullt", ka vështirësi në ndjekjen e mendimeve të saj dhe herë pas here harron se ku po shkon.

Pas përpjekjes për ekzekutim, Pajk përfundoi në spital në gjendje kritike, pasi më parë kishte humbur ndjenjat. Sipas informacioneve më të fundit, ajo po rikuperohet fizikisht, megjithëse duart i ka të dëmtuara rëndë dhe ende ka vështirësi në përdorimin e tyre.

Gjatë ekzekutimit të dënimit me vdekje, stafi i burgut i injektoi dy doza pentobarbital. Pasi u bë e qartë se nuk do të vdiste, ajo u dërgua në spital.

"Sot është zgjuar dhe ecën për herë të parë, por vetëm lëviz nëpër dhomë dhe nuk do të shkojë shumë larg", tha Ferel, duke shtuar se ende nuk dihet nëse do të pësojë pasoja të përhershme.

Ekipi i saj ligjor kundërshton një përpjekje tjetër për ekzekutimin e saj me të njëjtën metodë dhe i kërkon guvernatorit të Tenesit, Bil Li, që të zëvendësojë dënimin e saj me burgim të përjetshëm pa mundësi lirimi me kusht.

Ndërkohë, mbështetësit e dënimit me vdekje propozojnë metoda të tjera. Senatorja republikane Marsha Blakbern tha: "Rikthejeni karrigen elektrike".

Pas ekzekutimit të dështuar, guvernatori Li urdhëroi ndalimin e të gjitha ekzekutimeve në Tenesi deri në fund të vitit dhe urdhëroi një hetim për atë që shkoi keq. Kreu i shërbimit shtetëror të burgjeve dha dorëheqjen.

Ndërkohë, gjykata urdhëroi autoritetet që të ruajnë të gjitha provat lidhur me ekzekutimin e dështuar, duke përfshirë tubat intravenozë, shiringat, paketimin dhe dokumentacionin tjetër. Kjo mund të jetë e rëndësishme në një padi të mundshme të Pajk kundër shtetit.