Rusët bombarduan një shkollë në Ukrainë, të paktën 31 të vdekur, 48 të zhdukur

Të paktën 31 persona kanë vdekur në një sulm rus ndaj një ndërtese shkollore në Komishuvakha, në rajonin e Zaporizhzhias, dhe 48 persona konsiderohen të zhdukur. Forcat ruse hodhën të paktën nëntë bomba mbi objektin, i cili shërbente si strehë për civilët dhe si qendër për shpërndarjen e ndihmave humanitare, raporton CNN.

Sipas guvernatorit lokal Mihailo Semikin, njerëzit ishin strehuar në një bodrum të ri të forcuar, ndërtimi i të cilit ishte financuar nga Bashkimi Evropian. Megjithëse hapësira ishte projektuar për të përballuar shumicën e sulmeve, fuqia e bombave shkaktoi rrëzimin e strukturës së betonit dhe ndezi zjarr.

Streha u ndërtua vitin e kaluar për të mundësuar mësimdhënien, megjithatë, ndërsa luftimet afroheshin në fshat, shumica e banorëve u larguan. Si pasojë, objekti nuk u përdor më si shkollë, por si qendër administrative dhe pikë humanitare.

Presidenti ukrainas, Volodymyr Zelensky, e përshkroi sulmin si "plotësisht të tmerrshëm", duke theksuar se strehimi u godit të hënën, pikërisht në momentin kur po shpërndaheshin ndihma humanitare.