Turqia do të blejë naftë dizel sipas marrëveshjes mes SHBA-së dhe Rusisë

Turqia planifikon të blejë naftë dizel brenda marrëveshjes kontestuese mes Shteteve të Bashkuara të Amerikës dhe Rusisë, njoftoi sot ministri turk i energjetikës Alparslan Bajraktar, transmetoi gazeta gjermane „Handelsblatt“.

Bajraktar në një intervistë për televizionin „Kanal 7“ deklaroi se marrëveshja mes SHBA-së dhe Rusisë është e rëndësishme për sigurinë energjetike të Turqisë.

„Me presidentin amerikan Donald Trump është arritur marrëveshje për naftë dizel. Bazuar në bisedat tona, një pjesë e asaj nafte dizel do të furnizohet në Turqi“, tha ministri, pa zbuluar detaje të mëtejshme për marrëveshjen.

Marrëveshja u kritikua ashpër nga presidenti ukrainas Volodymyr Zelensky dhe politikanë evropianë, si dhe nga anëtarë të veçantë të Partisë Republikane të Trumpit.

Turqia planifikon rritje të konsiderueshme të prodhimit vendas të gazit

Bajraktar njoftoi gjithashtu se Turqia planifikon të rrisë ndjeshëm prodhimin vendas të gazit natyror.

Fillimi i punës së platformës së dytë lundruese për prodhimin e gazit pritet në tremujorin e parë të vitit 2028. Me këtë, prodhimi ditor i gazit në Detin e Zi do të rritej në 45 milionë metra kub.

„Kjo do të thotë se tre nga katër familje në Turqi do të përdorin gazin tonë“, theksoi ministri.

Turqia dje lëshoi në Detin e Zi platformën e saj të parë lundruese për prodhimin e gazit, të quajtur „Osman Gazi“.

Me aktivizimin e saj, prodhimi ditor nga vendi më i madh vendas i gazit Sakarya duhet të rritet më shumë se dyfish, nga 9.5 milionë në 20 milionë metra kub.

Turqia është një nga tregjet më të mëdha të gazit natyror në Evropë, dhe deri tani pothuajse të gjitha nevojat e saj i ka plotësuar përmes importit.

Vitin e kaluar vendi konsumoi 59 miliardë metra kub gaz natyror, ndërsa prodhimi vendas ishte vetëm 3.1 miliardë metra kub.

Hulumtimet për naftë dhe gaz pranë Pakistanit janë shtyrë

Ministri turk i energjetikës njoftoi gjithashtu se hulumtimet e planifikuara për hidrokarbure pranë bregut të Pakistanit janë shtyrë për rreth gjashtë muaj.

Si shkak të shtyrjes u përmend ndikimi i luftës në Iran në rajon.