(Video) Dyqanet në Francë mbrojnë vitrinat para protestave të reja
Dyqanet dhe butiqet luksoze nëpër Francë po mbrojnë hyrjet dhe vitrinat me panele druri, ndërsa disa prej tyre njoftuan se do të qëndrojnë të mbyllura për shkak të frikës nga plaçkitjet dhe vandalizmi gjatë protestave të sotme kundër kostove të larta të jetesës dhe rritjes së çmimeve të karburanteve.
Frikërat u shtuan pas trazirave të javës së kaluar, kur grupe të maskuara plaçkitën qindra dyqane në Paris, Marsejë dhe Bordo. Pronaret e bizneseve po marrin masa shtesë sigurie për të mbrojtur pronën, ndërsa autoritetet po përgatiten për një valë të re demonstratash në të gjithë vendin.
Në Paris janë mbyllur edhe disa muze të mëdhenj, përfshirë Luvrin, dhe në rrugë janë vendosur forca policore të forcuara. Autoritetet franceze njoftuan angazhimin e rreth 70,000 policëve, me mbështetje nga helikopterë, automjete të blinduara dhe topa uji. Në qytete të caktuara janë ndaluar protestat dhe janë vendosur orë policore lokale.
Ka tension edhe rreth protestës në Paris, rruga e së cilës u ndryshua në momentin e fundit. Tubimi fillimisht duhej të mbahej midis shesheve Bastilja dhe Nacioni, por policia e zhvendosi itinerarin midis Port d’Itali dhe Port de Vincennes, ndërsa fillimi u shty nga ora 13 në 19.
Udhëheqësit politikë të majtë kritikuan vendimin, duke vlerësuar se ndryshimi krijon konfuzion dhe e vështirëson organizimin e demonstratave. Koalicioni i sindikatave njoftoi se do të mblidhet në itinerarin fillestar të planifikuar, pavarësisht ndalimit për të.
Lëvizja "Jelekët e Verdhë" njoftoi më shumë se 700 aksione proteste në të gjithë Francën, duke përfshirë rrethrrotullime, stacione karburanti, stacione hekurudhore dhe pranë depot e naftës. Sipas të dhënave zyrtare, fundjava e kaluar rreth 550,000 njerëz morën pjesë në protestat në të gjithë vendin.
Presidenti francez Emmanuel Macron njoftoi se do të ndalohen protestat që autoritetet i vlerësojnë si të paligjshme, duke akuzuar grupet radikale të majta dhe vandalët për dhunën e fundjavës së kaluar.
Ndërkohë, nxënësit dhe studentët bënë thirrje për vazhdimin e demonstratave derisa qeveria të ofrojë propozime konkrete për përmbushjen e kërkesave të tyre.
