(Video) Njerëzit kanë paguar për të jetuar në një kruzer: tani u është thënë të largohen për shkak të çmimeve të karburantit
Kruzeri amerikan, i quajtur "kruzeri banesor", ka ndalur udhëtimin e tij rreth botës dhe aktualisht është ankoruar në Kamboxhia. Për shkak të kostove të larta të karburantit, qindra pasagjerë u detyruan të largohen nga anija, e cila ishte reklamuar si një kombinim i jetesës afatgjatë në det dhe udhëtimit rreth botës. Anija Odyssey nisi lundrimin para dy vjetësh në një udhëtim të planifikuar trevjeçar nëpër shtatë kontinente, shkruan "Independent".
Rritja e çmimeve të karburantit ndaloi udhëtimin
Kompania Villa Vie Residences, me seli në Florida, njoftoi se shpenzimet mujore për karburant për kabinë janë rritur nga mesatarja prej 1,800 dollarë në një shumë që vlerësohet midis 6,000 dhe 8,000 dollarë në disa pjesë të Azisë. Si shkak përmendet lufta në Iran. Nga kompania thonë se kanë tentuar të ulin konsumin duke ulur shpejtësinë e lundrimit dhe duke qëndruar më gjatë në porte, por kjo nuk ka qenë e mjaftueshme për të mbuluar rritjen e papritur të çmimeve.
"Nuk mund të mbulonim më humbjet operative që po grumbulloheshin", thuhet në njoftim. "Nuk është realiste që gjithë kostoja të kalojë tek banorët. Prioriteti ynë tani është të sigurojmë mbështetje për banorët, ekuipazhin dhe punonjësit", shtojnë nga kompania, duke theksuar se po punojnë për të zbatuar një ristrukturim.
Fat i pasigurt për pasagjerët dhe ekuipazhin
Administrata e portit Sihanoukville njoftoi javën e kaluar se anija u ankorua më 23 tetor, me plan të qëndrojë pesë ditë. Duhej të nisej për në Vietnam, por sot ende ndodhet në port. Në anije kishte 203 pasagjerë nga 15 vende, kryesisht shtetas amerikanë, si dhe 156 anëtarë të ekuipazhit. Kapaciteti total i anijes është 650 persona.
Pasagjerëve u është kërkuar të largohen nga anija, ndërsa statusi i ekuipazhit aktualisht është i panjohur. "Odyssey" kishte një plan udhëtimi të përcaktuar deri në nëntor 2027. Kompania planifikonte të prezantonte edhe një kruzer të dytë banesor në fillim të vitit 2029, por në njoftimin për ndërprerjen e operacioneve të "Odyssey" anija e dytë nuk përmendet.
