(Video) Trump: Thonë se Kina na spiunon, por edhe ne i spiunojmë ata, mos u shqetësoni
Presidenti amerikan, Donald Trump, në tubimin zgjedhor të republikanëve dje në Dubuque, në shtetin amerikan të Ajovës, foli hapur për aktivitetet e inteligjencës amerikane kundër Kinës dhe Rusisë. Ai deklaroi se SHBA-ja spiunon të dy vendet dhe pretendoi se shërbimet amerikane të inteligjencës e bëjnë këtë punë më mirë se ato kineze dhe ruse.
"Dikush më tha: ‘Zotëri, Kina na spiunon’. I përgjigja: ‘Po, edhe ne i spiunojmë ata. Mos u shqetësoni për këtë’", tha Trump.
"Pastaj më thanë: ‘Kjo është e tmerrshme, zotëri. Kina dhe Rusia na spiunojnë’. U thashë: ‘Është e vërtetë. Edhe ne i spiunojmë ata, por e bëjmë më mirë. Prandaj mos u shqetësoni. Mos u shqetësoni’", vazhdoi presidenti amerikan.
Trump filloi të flasë për spiunimin ndërsa përshkruante operacionet ushtarake amerikane kundër Iranit dhe vështirësitë në gjetjen e përfaqësuesve iranianë me të cilët Uashingtoni mund të negociojë.
"Ata nuk kanë marinë. Kishin 159 anije. Kishin 268 avionë. Avionët e tyre janë shpërndarë në pistat nëpër Iran, të copëtuar. Nuk kanë radarë. Nuk kanë armatim kundër ajrit. Nuk kanë udhëheqës", tha Trump.
Më pas bëri shaka për sulmet amerikane ndaj udhëheqjes iraniane.
"Mendoj, kishin udhëheqës. Ky është problemi im. Ndoshta e teprova pak me udhëheqësit e tyre. Nuk kam me kë të flas. Po përpiqem të gjej dikë me të cilin të flas. Askush nuk dëshiron të jetë president", tha ai.
Trump dha këto deklarata të dielën, më 1 nëntor, në një tubim në Dubuque, dy ditë para zgjedhjeve amerikane për Kongres.
Në Ajova ai mbështeti kandidatët republikanë dhe i bëri thirrje votuesve të dalin në zgjedhje që republikanët të ruajnë kontrollin mbi Kongresin.
Presidenti amerikan gjatë fjalimit u ndal disa herë te lufta me Iranin, duke pretenduar se forcat amerikane kanë shkatërruar pjesën më të madhe të kapaciteteve ushtarake iraniane.
Ai përsëriti gjithashtu se Uashingtoni po përpiqet të gjejë bashkëbisedues midis udhëheqjes së mbetur iraniane për të vazhduar negociatat.
